Ўзбекистон ва Покистон Марказий ва Жанубий Осиёни Афғонистон орқали боғлайдиган ва Покистон портларига олиб чиқадиган темирйўл қурилиши лойиҳасини тезлаштиришга келишди. Бу ҳақда Инвестициялар, саноат ва савдо вазирлиги хабар қилди.
Маълум қилинишича, Покистон делегациясининг ташрифи давомида Тошкентда инвестициялар, саноат ва савдо вазири Лазиз Кудратовнинг Покистон молия вазири Исъҳоқ Дор билан тор доирадаги учрашуви бўлиб ўтди.
Учрашувда трансафғон темирйўлини қуриш лойиҳасининг ҳаётга татбиқ этилишини тезлаштириш бўйича ҳам келишувга эришилди. Бундан ташқари, келишилган чора-тадбирлар қаторида мултимодал юк ташиш ҳажмини ошириш, маҳсулотларни учинчи давлатлар бозорларига биргаликда экспорт қилиш мақсадида ҳар икки давлат ҳудудларида терминаллар яратиш масалалари ҳам ўрин олди.
Шунингдек, транспорт ва логистика, ўзаро товар айланмаси, сармоявий ва саноат кооперацияси, банк иши каби устувор йўналишларда икки томонлама ҳамкорликни ривожлантириш истиқболлари муҳокама қилинди.
2022 йилда 240 миллион долларга етган Ўзбекистон—Покистон ўзаро савдо ҳажмини янада ошириш бўйича навбатдаги чора-тадбирлар кўриб чиқилди. Томонлар икки томонлама товар айирбошлаш ҳажмини кўпайтириш учун зарур шарт-шароитлар яратиш мақсадида Имтиёзли савдо тўғрисидаги битимни амалда жорий этиш ва транспорт йўлакларини диверсификация қилишни жадаллаштириш бўйича аниқ чора-тадбирлар қабул қилинишини қўллаб-қувватлади.
Шунингдек, икки мамлакат молия институтлари ўртасида вакиллик банк муносабатларини ривожлантириш бўйича чора-тадбирлар кўришга келишилди.
Маълумот учун, Термиз—Мозори Шариф—Кобул—Пешовар трансафғон темирйўли лойиҳасининг тахминий қиймати 5 миллиард долларни ташкил этади. Узунлиги 600 километр бўлган темир йўл Марказий Осиё мамлакатлари учун Покистоннинг йирик денгиз портларига чиқиш йўлини очиб беради. Бу эса минтақавий алоқа ва савдони ривожлантиришга хизмат қилади.
Шавкат Мирзиёев ушбу трансафғон темирйўлини аср лойиҳаси деб атаган. Темирйўл қурилиши 2022 йилнинг сентябрь ойида бошланиши режалаштирилганди. Бироқ режалар ўзгариши сабаб бу амалга ошмади.
Изоҳ (0)