Тошкент шаҳри Ички ишлар бош бошқармаси ахборот мультимедиа маркази бошлиғи Нилуфар Исаханова ижтимоий тармоқларда тарқалаётган бола ўғрилиги билан боғлиқ ҳолатлар юзасидан брифинг ўтказди.
Қайд этилишича, 2023 йилнинг шу даврида қадар пойтахтда бола ўғирлангани ёки бола ўғирланишига қасд қилингани ҳақида 6 та хабар тарқалган. Ҳар бир тарқалган хабар ўрганилган, лекин бирорта ҳам хабар ўз тасдиғини топмаган.
Таъкидланишича, Тошкент шаҳри ҳудудида сўнгги 5 йил давомида бирорта ҳам бола ўғирланиши ҳолати содир бўлмаган. Вояга етмаганлар бедарак кетган ҳолатлар бўлган, лекин барча вояга етмаганлар топилган ва оиласига қайтарилган.
2022 йил давомида 231 нафар вояга етмаганлар бедарак кетган сифатида рўйхатга олинган бўлиб, уларнинг ёш бўйича таҳлили қуйидагича:
- 10 ёшгача бўлган болалар 32 нафар;
- 10 ёшдан 14 ёшгача бўлган болалар 32 нафар;
- 14 ёшдан 18 ёшгача бўлган болалар 167 нафар.
Таҳлилларга кўра, вояга етмаганлар аксарият ҳолларда оила аъзолари билан ўзаро келиша олмагани, улардан хафа бўлгани ёки турли тазйиқларга учраган ҳолатларда ўз хоҳиши билан уйидан чиқиб кетади. Кичик ёшдаги болалар эса уйидан адашиб қолган ҳолатларда йўқолгани аниқланган.
Изоҳ (0)