Ўзбекистонда мактабгача таълим қамрови йилдан йилга ошиб бормоқда. Бу ўз-ўзидан боғчадаги тарбиячилар етишмовчилигини келтириб чиқара бошлади. Мисол учун, 2017 йилда мактабгача таълим тизимидаги педагоглар сони 58 минг 400 нафарни ташкил этган, холос. Кейинчалик ҳукумат томонидан бир қатор қонунлар ишлаб чиқилди ва 2023 йилга келиб бу кўрсаткич 151 минг 746 нафарга етди. Жумладан, Тошкент шаҳридаги Пучон университети (Жанубий Корея) ҳам айнан мана шу йўналишда кадрлар тайёрлаш билан шуғулланмоқда.
“Дарё” мухбири мазкур таълим муассасасида бўлиб, олийгоҳ катта ўқитувчиси Назокат Мансурхўжаевадан мактабгача таълим йўналишидаги талабалар қандай тайёрланиши хусусида интервью олди.
.JPG)
Иккита диплом олиш мумкин
Мактабгача таълим йўналишида дастур 3+1 шаклида ўқитилади. Уч йиллик ўқишдан сўнг талабаларга Тошкент шаҳридаги Пучон университети дипломи берилади. Битирувчилар хоҳишга кўра ўқишини яна бир йил Корея Республикасида давом эттириши мумкин. Шунда уларга яна бир диплом берилади.
Ўқитиш кредит-модул тизими бўйича олиб борилади. Maxсус фанлар 3 ёки 4 кредит (балл)дан, умумий фанлар 2 кредитдан ташкил топган. Семестр якунида талаба жами 120 кредитни йиғиши керак, акс ҳолда фанни ўзлаштирмаган деб ҳисобланиб, қайта ўқишга қолади. Дарслар ҳафтасига 5 кун давом этади, шанба ва якшанба — дам олиш кунлари. Ўқув жараёнлари эрталаб соат 9:30 дан 16:20 гача давом этади. Ўртада бир соатлик танаффус бор, бу вақтда талабалар тушлик қилади.
Дарс давомийлиги фаннинг аҳамиятига боғлиқ
Дарс жараёнлари нафақат маъруза шаклида, балки йўналтирилган усулда ҳам бўлиб ўтади. Мисол учун, факультетда лаборатория хоналари мавжуд. Улар барча талабларга мос равишда ташкил этилган бўлиб, талабалар дарс жараёнларидан узилмаган ҳолда иш муҳитига кириб бориш имкониятига эга бўлади.
Давлат университетларида дарслар паралар (1 соат 20 дақиқа) бўйича ўтилса, бу ерда бошқача — дарс давомийлиги фаннинг муҳимлик даражасига боғлиқ. Масалан, касбга доир аҳамиятга эга фанлар 3 га, умумийлари 2 га бўлиб ўтилади. Бўлимлар 50 дақиқа давом этиб, ўртада 10 дақиқадан танаффус берилади. Бу талабалар ўқув дастурини яхши ўзлаштириши учун қилинган. Чунки бир жараён 50 дақиқадан ўтиб кетадиган бўлса, толиқиш юзага келади ва шу толиқиш сабабли материални тўлиқ ўзлаштириш қийин кечади.
Агар маъруза дарснинг биринчи қисмида ўтилса, кейинги қисмларда талабалар турли хил фаолиятларга жалб қилиниб, бутун гуруҳ билан жамоавий ишлар олиб борилади. Дарсларда талабаларга ёш болалардаги ўзига хосликларни аниқлаш ва уларни ривожлантириш ўргатилади. Боланинг энг кучли томонларини топиб, уларни кичиклигидан тўғри йўналтириш бўйича сабоқ берилади.
Дарслар савол-жавоб ёки маъруза шаклида эмас, интерактив усуллар билан ўтилади. Талабалар тайёр дарсликлардан фойдаланиш билан бирга, мултимедиа орқали ҳам фанларни ўзлаштиради.
Кореялик ўқитувчилар
Олийгоҳга Кореядаги Пучон университетидан ҳам ўқитувчи-профессорлар олиб келинган, улар шартнома асосида бир неча йил Ўзбекистонда ишлайди. Хорижлик мутахассислар дарсни корейс тилида ўтади, унинг сўзлари ўзбек ва рус тилларига синхрон таржима қилиб борилади. Шунингдек, Тошкентдаги юқори малакали ўқитувчилар ҳам жалб қилинган.
Битирибоқ раҳбарлик лавозими
Университет давлат ва хусусий мактабгача таълим ташкилотлари билан меморандумлар имзолаган. Шунинг асосида талабалар амалиётда иштирок этади. У ерда ўқитувчилар ва тарбиячилар назоратида болалар билан ишлаш борасида тажриба тўплайди. Кўпинча улар ўзини яхши кўрсатгани учун ўша пайтнинг ўзида ишга олиб қолинади.
Мактабгача таълим вазирининг 2021 йил 31 декабрдаги буйруғига асосан, Тошкентдаги Пучон университетини битирган талабалар иш стажига эга бўлмай туриб МТТ раҳбари лавозимларига тайинланиши мумкин бўлади.
Ҳар йили иккинчи семестр якунида “Меҳнат ярмаркалари” ташкил этилади. Унда талабалар иш берувчилар билан бевосита мулоқот қилади ва ишга жойлашиш имконига эга бўлади. Бундан ташқари, меҳмонлар талабаларнинг билим ва кўникмалари билан танишади.
Кореяга саёҳат
Дарсларни яхши ўзлаштирган иқтидорли талабалар ҳар ўқув йили сўнггида Жанубий Кореяга саёҳатга юборилади. У ерда Пучон университетида бўлиб, ўқув жараёни, кореялик талабалар билан танишади ва тажриба тўплайди.
Шунингдек, корейс тили бўйича билим ва кўникмаларини ошириш истагини билдирган талабалар учун ҳам ёз фаслидаги таътил пайти Корея Республикасидаги Пучон университетида қисқа муддатли тил амалиёти курсларида ўқиб келиш имконияти яратилган.
Малака ошириш курслари
Кундузги, кечки, сиртқи бўлимлардан ташқари, “Малака ошириш курслари” ҳам ташкил этилган. Унда нафақат талабалар, балки мактабгача таълим ташкилотларида фаолият юритаётган раҳбар ва педагоглар ҳам тингловчи сифатида иштирок этади.
Изоҳ (0)