Россия Федерацияси Коммунистик партиясидан Самара вилоят думаси депутати Михаил Абдалкин Владимир Путиннинг Федерал кенгашга мурожаатини қулоғига лағмон илган ҳолда томоша қилди. Унинг ҳолати акс этган видео тарқалгач, депутат партия раҳбарияти томонидан танқид қилинди.
Абдалкиннинг ўзи видеони ижтимоий тармоқлардаги шахсий саҳифаларига жойлаган. У мурожаатни вилоят думасидаги Коммунистик партия фракцияси раҳбариятининг илтимосига кўра томоша қилганини таъкидлади. “Тўлиқ қўллаб-қувватлайман, тўлиқ қўшиламан, ажойиб чиқиш. Сўнгги 23 йил ичида бундай гапларни эшитмагандим. Ҳайратдаман”, — дея изоҳ қолдирган депутат видеога.
Коммунистик партия фракцияси матбуот хизмати раҳбари Александр Юшенко “Газета.ру”га берган интервьюсида Абдалкиннинг қилмишини “аҳмоқлик” деб баҳолади ва уни интернетда “тезда машҳурликни қўлга киритиш” истагида айблади. Юшенко бу иш Самара вилоят думасидаги Коммунистик партия фракцияси раҳбариятининг “эътиборидан четда қолмаслигига” ваъда берди.
Коммунистик партия раҳбари Геннадий Зюганов дума йиғилишида Путиннинг мурожаатини олқишлаб, президент кўрсатган “ишонч ва реализм”ни қайд этиб, бундан кейин президентга қарши “ҳужумлар” бўлмаслигини таъкидлаган. “Ягона Россия” депутати Александр Хинштейн Зюгановнинг сўзлари контекстида Абдалкинни “жиловини тортиб қўйишни” талаб қилган.
Изоҳ (0)