“Ўйнаб маза қиламан, одамларнинг гапига эътибор бермайман”. Наргиза Азимова интернетда тарқалаётган рақслари ҳамда доим қизил кийимда юришининг сабаби ҳақида гапирди

Хонанда Наргиза Азимова “Миллий” телеканалининг “М Коктейл” кўрсатувига берган интервьюсида оиласи, нимага доим қизил кийимда юриши, ижтимоий тармоқлардаги видеоларига танқидий қарашса, қандай муносабат билдиришини сўзлаб берди.

“Ота-онам қишлоқдан чиққанимни ёдимда сақлашим кераклигини айтган”

Қизил либосда юрганимга 25 йил бўлди. Ҳамма либосларим қизил рангда, ўзим ҳам қизил рангни яхши кўраман. Ота-онамга ҳеч қачон ўзгармайман, деб саҳнага чиққанман. Балки кейинроқ бошқа рангдаги либосларни киярман. Ойим ҳам: “Қариганингда қип-қизил кийиниб юрмайсан-ку”, — деб гапирадилар. Савол беришса, ўша кун ёдимга тушади. Ҳеч қачон ўзгармайман, бориб ижод қилишимга рухсат беринглар деб сўраганман. Ота-онам қишлоқдан чиққанимни ёдимда сақлашим кераклигини айтган. Ойим: “Бошқа рангдаги либосларни кий, биз сендан розимиз, невараларинг бор, ҳаётни аччиқ-чучугини кўрдинг, ўзинг билганингдек яша”, — дейди. Ҳозир ўзгариш хаёлимда ҳам йўқ.

“Қаерга борсам ҳамма ёш кўринасиз дейишади, невараларим борлигига ишонишмайди”

Ўртача шароитдаги оилада катта бўлганман. Нима топсам доим ота-онамга илинганман. Нима қилсам, халқ мени яхши кўрсин деганман. Хизматга борганимда ҳам ота-онамга берган ваъдамни ёдда сақлаганман. Ҳар куни эрталаб ота-онамдан дуо оламан. Қаерга борсам ҳамма ёш кўринасиз дейишади, невараларим борлигига ишонишмайди. Катта неварам тўрт ёшда, қизим Сурхондарёга келин бўлган. Иккинчи неварам икки ёш, ўғлимнинг фарзанди эса бир ярим ёш.

Ўғлим мақомларни мендан ҳам чиройли ижро қилади. Онам санъатга қизиққан. Онамнинг армонлари баъзи қўшиқларимда яширинган.

Ота-онам ҳам саҳнага чиққанимда бошқа инсонни кўрганидан ҳайрон бўлишини айтган. Саҳнага чиққанимда ҳамма нарсани эсимдан чиқараман. Жуда кўп қийинчиликлар бўлган. Саҳнага чиққандан кейин мақсадим халқнинг кўнглини олиш бўлади. Саҳнадан тушгандан кейин сипо Наргизага айланаман.

“Саҳнага чиққанимда бутунлай бошқача инсонга ўхшаб қоламан” 

Укаларим ва ўғилларим менга салбий изоҳ ёзишганини кўриб кулишади. Мен индаманглар, дейман. Улар яхши кўрганидан шундай ёзади, балки мени қизғонар. Ҳар доим ўзимни хурсанд қилишга ҳаракат қиламан. Дунёмда маза қилиб яшайман.

Аввал кўпинча мақом йўналишида қўшиқ айтар эдим. Лекин шўх, хоразмча қўшиқларни айтсам, маза қиламан. Аввал ҳам ўйнар эдим, фақат ижтимоий тармоқлар ривожланмагани учун халққа етиб бормаган. Саҳнага чиққанимда бутунлай бошқача инсонга ўхшаб қоламан. Халқдан завқланаман, тўйга борган айрим инсонлар ҳам юрагида ташвиш билан келади, уларни рақсга таклиф қиламан.