Украина ташқи ишлар вазири Дмитрий Кулеба Ғарб қирувчилари Киевга етказиб берилса, улардан Россия ҳудудига зарба бериш учун фойдаланмасликка ваъда берди. Бу ҳақда у Sky News телеканалига берган интервьюсида айтган.
“Биз Ғарб қуролларидан Украина ҳудудларини озод қилиш учун фойдаланишга кафолат беришимиз мумкин”, — деди Кулеба Украина Россия ҳудудига зарба бериш учун Ғарб самолётлари ва узоқ масофали қуроллардан фойдаланмаслигига кафолат бера оласизми, деган саволга жавобан.
Ғарб давлатлари январь ойида Киевга реактив қирувчи самолётлар етказиб бериш масаласини муҳокама қила бошлаган. Украина президенти Владимир Зеленский уларнинг етказилишига эришишга ваъда берган. Бу ғояни Болтиқбўйи мамлакатлари қўллаб-қувватламоқда, деб ёзади Politico.
“Бундай қарор қабул қилиш осон бўлмайди”, — деди Польша президенти Анжей Дуда. Германия канцлери Олаф Шолс эса Ғарб қирувчиларининг юборилишини рад этди ва бу мавзуни муҳокама қилишни тўхтатишга чақирди.
АҚШ ҳам Киевга жанговар самолётлар билан ёрдам ваъда қилишдан бош тортди, аммо учинчи давлатлардан бирортаси ёрдам бермоқчи бўлса, Америка буни мамнуният билан қабул қилади, деб таъкидлади Оқ уй. Буюк Британия мудофаа вазири Бен Уоллеснинг айтишича, Украина Россия билан уруш тугаганидан кейингина замонавий Ғарб қирувчиларини олиши мумкин. У буни Киевнинг ғарбий ҳамкорлари ўртасидаги консенсус деб атади.
Изоҳ (0)