“Туман ривожи учун 58 млрд сўм берилди, ишонинг, туманларга тарихда бунча пул берилмаган” — Тошкент тумани ҳокими

Тошкент вилоятининг Оққўрғон тумани — ҳудуднинг энг оғир, таъбир жоиз бўлса “қизил” ҳудудларидан бири бўлган. Президент Шавкат Мирзиёев топшириғига кўра, айнан вилоятнинг энг оғир ҳудудини ривожлантириш орқали “Оққўрғон тажрибаси” шакллантирилди. Мазкур тажриба айни кунга келиб Тошкент туманида ҳам татбиқ этилмоқда.

Тошкент тумани ҳокими Одилхон Рустамов “Дарё” журналисти билан суҳбатда “Оққўрғон тажрибаси” нима, айнан бу тажрибани Тошкент туманида татбиқ қилиш орқали нимага эришилади? Шу хусусида гапириб берди.

“Сўнгги олти йил давомида республикада ‘маҳаллабай’ ишлаш тизими йўлга қўйилди. ‘Оққўрғон тажрибаси’нинг аввалги тажрибалардан фарқли жиҳати, энди муаммолар ‘хонадонбай’, ‘фуқаробай’ ўрганилиб, ҳар бир фуқаронинг ўзи билан гаплашилмоқда. 38 та йўналиш бўйича сўровлар ўтказилиб, газ, чироқ, йўл масалалари бўйича мавжуд муаммолар ўрганилмоқда”, — дейди туман ҳокими Одилхон Рустамов.

Туман ҳокимининг айтишича, ҳудуд Тошкент шаҳридан нари борса 10 километр узоқликда жойлашган бўлса-да, 70 йилдан бери туманда ичимлик суви муаммо бўлиб келган.

“143 миллион долларлик лойиҳа асосида Қибрай, Зангиота, Чиноз ва Тошкент туманига ичимлик суви кириб келмоқда. Президентимизнинг 408-сонли қарорига кўра, эндиликда маҳаллада яшовчи аҳолидан муаммони сўраб, уларнинг дардини тинглаб, айнан уларнинг талабидан келиб чиққан ҳолда республикага таклиф беряпмиз. Бу айнан Оққўрғон тажрибасининг ўзига хослиги бўлмоқда”, — дейди ҳоким.

Ҳокимнинг маълумот беришича, “Оққўрғон тажрибаси”ни Тошкент туманига татбиқ қилиш мақсадида республика бюджетидан 58 миллиард сўм молиялаштирилган.

“Биз ҳар бир хонадонга кириб, керак бўлса ҳар бир фуқаронинг муаммосини, таклифини эшитдик ва уларнинг таклифларига кўра, қилиниши лозим бўлган ишлар ҳақида республикага таклиф бердик. Айнан ‘Оққўрғон тажрибаси’ни туманда татбиқ қилиш учун республика бюджетидан 58 миллиард сўм маблағ ажратилди. Туман тарихда бундай пулга эга бўлмаган. Бу ҳам давлат раҳбарининг эътибори”, — дейди туман раҳбари.

Қўшимча қилинишича, Тошкент туманидаги мавжуд 70 та маҳалланинг 8 таси энг оғир маҳалла ҳисобланади.

“Туманимиздаги энг оғир 8 та маҳалла бўладиган бўлсак, бу маҳаллалардаги муаммоларни ўрганиб, туман миқёсида ҳал этиладиганларини туманда ҳал қиламиз, ечими вилоят ва республикага бориб тақаладиган масалалар эса ишчи гуруҳ вакиллари томонидан республика раҳбарларига олиб чиқилади”, — дейди у.

Тошкент тумани ҳокимининг айтишича, туманда боқимандалик кайфиятидаги мурожаатчилар деярли қолмаган.

”Туманимизда гулчилик ва картошкачилик ривожланган. Гул етиштирган тадбиркорларимиз етиштирган гулини хорижга чиқармоқда. Айни кунда туманимизда ишсиз фуқароларга 4-5 миллион сўм маош таклиф қилинмоқда”, — дейди ҳоким.