Самарқанд вилоятида газ ва электр энергиясидан ноқонуний фойдаланиш оқибатида 18,2 миллиард сўм миқдорида зарар етказилди. Бу ҳақда Бош прокуратура ахборот хизмати хабар берди.
Хабарга кўра, вилоят прокуратураси органлари томонидан ўтказилаётган назорат тадбирлари давомида аниқланган 700 та ҳолатда газ ва электр энергиясидан ноқонуний фойдаланиш оқибатида, 18,2 миллиард сўм миқдорида зарарлар аниқланган. Мазкур ноқонуний ҳолатлар юзасидан 40 нафар шахс маъмурий жавобгарликка тортилди.
Қўпол қонунбузилиши ҳолатлари юзасидан 14 та жиноят иши қўзғатилди, ноқонуний ҳолатлар юзасидан иқтисодий судларга 28 миллиард сўмлик 344 та даъво аризаси киритилиши таъминланди.
Бугунги кунда етказилган зарарнинг 2 миллиард сўмдан ортиғи қопланиши таъминланди. Шунингдек, эгаси аниқланмаган энергия ресурслари бўйича ўтказилган ўрганишларда давлат ва жамият манфаатларига 1,2 миллиард сўмлик зарар етказилганлиги аниқланиб, мазкур ҳолатлар юзасидан вилоят прокуратураси томонидан жиноят иши қўзғатилиб, дастлабки тергов ҳаракатларига киришилди.
Бундан ташқари, вилоят прокуратураси томонидан шакллантирилган ишчи гуруҳ томонидан энергия ресурсларини кўп истеъмол қилувчи ҳамда энергия ресурслари кўрсаткичлари тегишли дастурларида қайд этилмаётган йирик улгуржилар рўйхати шакллантирилиб, ўрганилмоқда.
Изоҳ (1)
Ислохотни халкни ичидан бошлаш керак