Навоийда электр тармоғига ноқонуний уланиб, жами 452 млн сўмлик электрдан фойдаланган тадбиркор ушланди

Навоий ва Жиззах вилоятларида электр тармоқларига ўзбошимчалик билан уланиш ҳолатлари фош этилмоқда. Бу ҳақда Иқтисодий жиноятларга қарши курашиш департаменти хабар қилди.

Қайд этилишича, Бош прокуратура ҳузуридаги департаментнинг Навоий вилоят бошқармаси томонидан бошқа ҳуқуқни муҳофаза қилиувчи органлар билан ҳамкорликда терговга қадар текширув ўтказилган. Унда “Н.Э.” МЧЖ масъул шахслари Навоий шаҳрида кўп қаватли бинони қуришда ҳудудий электр тармоқлари корхонаси билан шартнома тузмасдан, умумий фойдаланишдаги электр тармоғига ўзбошимчалик билан уланиб, жами 452,4 миллион сўмлик электр энергиясидан ноқонуний фойдалангани аниқланган.

Шунингдек, департаментнинг Шароф Рашидов туман бўлими томонидан ҳудудий электр тармоқлари корхонаси ходимлари билан ҳамкорликда терговга қадар текширув ўтказилган. Унда “Ж.С.Т.” МЧЖ туман филиали масъул шахслари “Файзобод” маҳалласи ҳудудида жойлашган сув узатиш иншоотида ўрнатилган электр ҳисоблагичга зарар етказгани аниқланган. Улар жами 110,4 миллион сўмлик электр энергиясидан ноқонуний фойдаланган.

Ҳолатлар юзасидан Жиноят кодексининг 185-2-моддаси (электр, иссиқлик энергияси, газ, водопроводдан фойдаланиш қоидаларини бузиш) билан жиноят ишлари қўзғатилган. Ҳозирда тергов ҳаракатлари ўтказилмоқда.