Улуғбек Эгамов Инвестициялар, саноат ва савдо вазирлиги ҳузуридаги Фармацевтика тармоғини ривожлантириш агентлиги директори лавозимига тайинланди.
У 2022 йил 12 апрель куни президент топшириғи билан агентлик директорининг биринчи ўринбосари лавозимига тайинланганди. Унга лойиҳалар билан ишлаш тизимини мутлақо янгидан ташкил этиш вазифаси юклатилган.
Шу кунги йиғилишда агентлик ва вилоят ҳокимлари олдига 2022 йилнинг ўзида 80 миллион долларлик 34 та лойиҳани ишга тушириш вазифаси қўйилгани маълум қилинган. Мутасаддиларга йирик хорижий компаниялар билан музокаралар ўтказиб, камида 10 та брендни жалб қилиш бўйича келишувга эришиш топширилган.
Эслатиб ўтамиз, 2023 йил 10 февраль куни Фармацевтика тармоғини ривожлантириш агентлиги собиқ раҳбари Сардор Кариев қамоққа олинганди. Маълум қилинишича, агентлик томонидан Фармацевтика тармоғини ривожлантириш агентлиги ва унинг ҳузуридаги “Дори воситалари, тиббий буюмлар ва тиббий техника экспертизаси ва стандартлаштириш давлат маркази” ДУКда ўтказилган ўрганиш якунларига кўра аниқланган жуда кўп миқдордаги молиявий хато ва камчиликлар ҳамда бюджет маблағларининг сарф қилинишида белгиланган талабларнинг қўпол равишда бузилганлик ҳолатлари бўйича жиноят иши қўзғатилган.
Ҳозирда ДХХ тергов бошқармаси томонидан тергов ҳаракатлари олиб борилмоқда. Шунингдек, “Док-1 Макс” ва “Амбронол” сиропининг ножўя таъсири сабабли ўткир буйрак етишмовчилиги ташхиси билан болалар вафоти бўйича қўзғатилган жиноят иши тергови доирасида бир қатор мансабдор шахслар қамоққа олинган. Хусусан, тўпланган далиллар асосида Фармацевтика тармоғини ривожлантириш агентлиги ҳамда унинг ҳузуридаги “Дори воситалари, тиббий буюм ва тиббий техника экспертизаси ва стандартлаштириш давлат маркази” ДУК директори Сардор Кариев ҳамда содир этилган жиноятларга алоқадор бўлган унинг бир нечта жиноий шериклари иш бўйича гумон қилиниб, уларга нисбатан қамоқ эҳтиёт чораси қўлланган.
Изоҳ (0)