20 февраль куни Тошкент шаҳар Ички ишлар бош бошқармасида ўтказилган “Ахборот-технологиялари соҳасидаги жиноятларнинг турлари ва ҳимояланиш усуллари” мавзусида брифинг ўтказилди. Бу ҳақда тадбирда иштирок этган “Дарё” мухбири хабар бермоқда.
Брифингда кибержиноятларнинг келиб чиқиши бўйича турлари ҳақида маълумот берилиб, уларнинг аксарияти телефон рақамга ҳеч кимга бермаслик тўғрисидаги огоҳлантириш билан келадиган махсус код орқали содир этилаётгани қайд этилди.
Айтилишича, махсус код рақамлари орқали қуйидаги услублардан фойдаланган ҳолда жиноят содир этилмоқда:
- ўзини банк ёки мобил тўлов тизими ходими деб таништириб, пластик картага ҳакерлар ҳужуми уюштирилаётганини айтиб ишонтириш;
- фоизсиз кредит каби қизиқиш уйғотувчи фейк хабарларни банк ёки тўлов тизимларининг сохталаштирилган сайти ҳаволаларида ёритиш;
- OLX платформасида арзон нархдаги турли буюмларни савдога қўйиш орқали фуқаролар қизиқишини уйғотиш;
- онлайн савдо билан шуғулланувчи “E-shop” интернет-дўконларининг сохта иловаларида фуқароларни алдов йўли билан рўйхатдан ўтказдириш;
- давлат томонидан моддий ёрдам берилаётгани ҳақидаги ёлғон маълумотларни ҳукумат идораларининг сохталаштирилган веб-сайтлари ҳаволалари орқали ёритиш.
Бундан ташқари, баъзи фуқаролар ўзини трейдерлик билан шуғулланувчи шахс деб таништириб, пулларини икки баравар кўпайтириб беришини айтган фирибгарларга алданмоқда. Шунингдек, жиноятчилар:
- хонадонни ижарага бериш ҳақида ёлғон эълон бериш;
- вилоятлараро киракашлик қилувчи ҳайдовчиларга картадаги пулни нақд қилиб қайтаришини айтиш;
- PUBG, World of Tanks ўйинларида кучайтирилган аккаунтларни савдога қўйиш;
- арзон тилла буюмлар сотишини айтиб, фуқароларнинг ишончига кириш орқали пулларни ўзлаштирмоқда.
Изоҳ (0)