Фарғона ва Жиззах вилоятларида газ ва “свет”дан ноқонуний фойдаланганлар давлатга 820 миллион сўмдан ортиқ зарар етказди. Бу ҳақда Иқтисодий жиноятларга қарши курашиш департаменти ахборот хизмати хабар берди.
Хабарга кўра, департаментнинг Қўқон шаҳар бўлими томонидан ИИБ ва “Қўқоншаҳаргаз” бўлими ходимлари билан ҳамкорликда ўтказилган терговга қадар текширувда, фуқаролар Х.А. ва И.Х. “Қудуқлик” МФЙдаги оҳак ишлаб чиқариш цехида 2 дона хумдон ва 54 дона қўлбола газ ёндиргичларни умумий фойдаланишдаги газ тармоғига ўзбошимчалик билан улаб олиб, 672,7 минг куб табиий газдан ноқонуний фойдалангани аниқланган.
Департаментнинг Шароф Рашидов туман бўлими томонидан туман ЭТК ходимлари билан ҳамкорликда ўтказилган терговга қадар текширувда, А.Б. МЧЖ раҳбари ва бошқалар корхонага қарашли қурилиш объектларини туман ЭТК билан ҳеч қандай шартнома тузмасдан умумий фойдаланишдаги электр тармоғига ўзбошимчалик билан улаб, 330,5 минг кВт/с электр энергиясидан ноқонуний фойдалангани аниқланган.
Маълум қилинишича, ушбу қонунбузилиш ҳолатлари оқибатида, давлат ва жамият манфаатларига 821,4 миллион сўм зарар етказилган.
Мазкур ҳолатлар юзасидан Жиноят кодексининг 185-2-моддаси (электр, иссиқлик энергияси, газ, водопроводдан фойдаланиш қоидаларини бузиш) билан жиноят ишлари қўзғатилиб, тергов ҳаракатлари ўтказилмоқда.
Изоҳ (0)