“Ниҳол” мукофоти совриндори, хонанда Гулзода Худойназарова “Севимли” телеканалининг “Ўзим” кўрсатувига берган интервьюсида турмуш ўртоғи билан беш йиллик турмушидан сўнг ажрашгани ва унинг фарзанди билан қандай муносабатда экани ҳақида гапириб берди.
“Ҳаётий тажрибаларимиз иш бермади ва биз ҳеч қандай уруш-жанжалсиз, келишмовчиликларсиз ажрашдик”
Турмуш ўртоғим билан беш йил бирга яшадик, аммо ўртамизда севги йўқ эди. Ўзимга доим ҳаётимизни иккига ажратишимиз учун кимдир яхши, кимдир ёмон бўлиши керак, нимага бир-бирига феъл-атвори, табиати тўғри келмагани, яшай олмаётгани, севгини кўрмаётгани учун эр-хотинлик муносабатларида бир-бирига бўлган энергияни кўра олмаётгани учун ажрашиш мумкин эмас, нимага мен жабрдийда бўлишим керак, уни ёмонлашим керак, ёмонга чиқариб, ўзим оппоқ бўлиб кейин ажрашишим керак, деб савол берардим.
У ёмон эмас эди, балки мен у учун ёмондирман, лекин ўзим учун ёмонмасман. Биз шунақа ажрашдик: ҳаётимиз тўғри келмади, оила боқувчи роли менга ўтиб қолди. Сир эмас, қанча санъаткорлар буни яширса ҳам, буни билиш қийинмас. Оилада турмуш ўртоғимга оила боқувчиси, оила бошқарувчиси вазифасини топширишга ҳаракат қилдим. Ҳаётий тажрибаларимиз иш бермади ва биз гаплашиб, ҳеч қандай уруш-жанжалсиз, келишмовчиликларсиз ажрашдик. Яъни мен уйдан чиқиб кетдим, чиқиб кетганимда ҳам, онгимда у хулоса чиқариб, ҳаётини бошқа томонга ўзгартирса, оиламга қайтаман, унда ҳам севганим учун эмас, болам учун деганман. Чунки ҳақиқатан ҳам ўқидим, турмушга чиқиш ёшидан ўтдим, 29 ёшда эдим.
“Ота-онам турмушга чиқишимга истиҳола қилади, фарзандимнинг қалбини, кўнглини ўйлайди”
Турмуш ўртоғим билан тажрибам шу ерда тугади, фарзандим дунёга келиши керак экан, деб қарадим. Мен борича, ниқобсиз айтаман. Очиғини айтганда, ниқобли гаплардан чарчаганман. Ҳозир ҳам бир-биримизга ҳурматдамиз, келишиб боламизни овқатлантиришга, истироҳат боғларига олиб чиқамиз. Атрофимдаги ҳамма инсонлар бунга гувоҳ. Гоҳида турмуш ўртоғим уйга келиб, болам билан ўйнаб туради, гастрол сафарларига кетганимда, болам билан кўпроқ вақт ўтказинг, йўқлигим билинмасин, деганимда олиб кетиб қарайди.
Турмуш ўртоғим билан қалбан дўстона муносабатларимиз сақланиб қолган, бу этапларни қийин, азобда босиб ўтмадим. Ҳозир ҳам ҳаётимда ҳеч қандай эркак йўқ. Ота-онам турмушга чиқишимга истиҳола қилади, фарзандимнинг қалбини, кўнглини ўйлайди. Ҳаётимга бегона эркак келса, фарзандимнинг қалбига ханжар суқаётгандек бўлади. Агар мен шу онгда яшасам, ўғлим ҳам мендан андоза олиб, ўша вақтни англаб етиш вақтига келади ва у мени табиий равишда тушунишни истайди. Балки ўша пайт турмушга чиқарман, бироқ чуқурроқ ўйлаб қарасам, ҳозир ўзимда ҳам турмуш қуришга хоҳиш йўқ экан.
Мавзуга доир: “Америкада ишлаб эримга машина ва уй олиб бердим, лекин оиламни сақлаб қололмадим”. Моҳичеҳра Шомуродова омадсиз шахсий ҳаёти ҳамда фарзандининг касаллиги ҳақида (видео)
Изоҳ (0)