Энг кучли мудофаа ва Роналдуга етолмаган Левандовски. “Барселона”нинг навбатдаги ўйинига оид рекорд ва рақамлар

“Барселона” Ла Лига 22-турида “Кадис” устидан ишончли ғалабага эришди (2:0).

Каталонлар жорий мавсум ортда қолган 22 та турда 7 та гол ўтказиб юборди. Бу мусобақа рекорди ҳисобланади. Хави жамоасига “Реал” учта гол урган бўлса, “Реал Сосьедад”, “Осасуна”, “Эспаньол” ва “Бетис” биттадан тўп киритишга муваффақ бўлган.

Бундан аввалги рекордчилар 22 турда 9 та гол ўтказиб юборганди: “Барселона” (1986/87), “Депортиво” (1993/94) ва “Атлетико” (2017/18).

Мазкур 22 та ўйиннинг 17 тасида “кўк-анорранглилар” ўз дарвозаси дахлсизлигини сақлаб қолган. Бу ҳам рекорд натижа. “Барселона” бу борада 1993/94 йилги мавсумда 16 та қуруқ ўйин ўтказган “Депортиво”нинг рекордини янгилади.

Каталон клуби барча мусобақалар доирасида 26 октябрдан бери ютқазмай келмоқда. “Барселона” қаторасига 18 та ўйиндан бери мағлуб бўлмаяпти (16 ғалаба, 2 дуранг). Ла Лигада клуб кетма-кет 7 та ўйинни ғалаба билан якунлади ва уларда фақат битта гол ўтказиб юборди.

“Барселона”нинг кейинги ўйини 23 февраль куни Европа Лигаси доирасида “Манчестер Юнайтед”га қарши баҳс олиб боради.

“Барса” ҳужумчиси Роберт Левандовски Ла Лигадаги дастлабки 19 та ўйинида 15 та гол уришга эришди. XXI асрда фақат Криштиану Роналду 15 та голни полшаликдан тезроқ урган (17 та ўйинда). 34 ёшли форвард “Барселона” сафида барча мусобақалар доирасида 29 ўйин ўтказиб, 24 та голга муаллиф бўлди.