Eng kuchli mudofaa va Ronalduga yetolmagan Levandovski. “Barselona”ning navbatdagi o‘yiniga oid rekord va raqamlar

“Barselona” La Liga 22-turida “Kadis” ustidan ishonchli g‘alabaga erishdi (2:0).

Katalonlar joriy mavsum ortda qolgan 22 ta turda 7 ta gol o‘tkazib yubordi. Bu musobaqa rekordi hisoblanadi. Xavi jamoasiga “Real” uchta gol urgan bo‘lsa, “Real Sosyedad”, “Osasuna”, “Espanyol” va “Betis” bittadan to‘p kiritishga muvaffaq bo‘lgan.

Bundan avvalgi rekordchilar 22 turda 9 ta gol o‘tkazib yuborgandi: “Barselona” (1986/87), “Deportivo” (1993/94) va “Atletiko” (2017/18).

Mazkur 22 ta o‘yinning 17 tasida “ko‘k-anorranglilar” o‘z darvozasi daxlsizligini saqlab qolgan. Bu ham rekord natija. “Barselona” bu borada 1993/94-yilgi mavsumda 16 ta quruq o‘yin o‘tkazgan “Deportivo”ning rekordini yangiladi.

Katalon klubi barcha musobaqalar doirasida 26-oktabrdan beri yutqazmay kelmoqda. “Barselona” qatorasiga 18 ta o‘yindan beri mag‘lub bo‘lmayapti (16 g‘alaba, 2 durang). La Ligada klub ketma-ket 7 ta o‘yinni g‘alaba bilan yakunladi va ularda faqat bitta gol o‘tkazib yubordi.

“Barselona”ning keyingi o‘yini 23-fevral kuni Yevropa Ligasi doirasida “Manchester Yunayted”ga qarshi bahs olib boradi.

“Barsa” hujumchisi Robert Levandovski La Ligadagi dastlabki 19 ta o‘yinida 15 ta gol urishga erishdi. XXI asrda faqat Krishtianu Ronaldu 15 ta golni polshalikdan tezroq urgan (17 ta o‘yinda). 34 yoshli forvard “Barselona” safida barcha musobaqalar doirasida 29 o‘yin o‘tkazib, 24 ta golga muallif bo‘ldi.