2022 йилда Россия ва Хитой ўртасидаги савдо ҳажми йиллик ҳисобда 29,3 фоизга ўсди. Йил якунига кўра, бу кўрсаткич рекорд даражадаги 190,27 миллиард долларни ташкил этди. Бу ҳақда Хитой Халқ божхона бош бошқармаси маълумотларига таяниб, «Коммерсантъ» хабар бермоқда.
Россиядан Хитойга импорт 114,15 миллиард долларни ташкил этди, бу 2021 йилга нисбатан 43,4 фоизга кўпдир. Хитойдан Россияга экспорт ҳажми 12,8 фоизга ўсиб, 76,12 долларни ташкил қилди. Россиянинг ижобий салдоси қарийб уч баробарга ошиб, 38 миллиард долларга етди. Бу эса асосан нефть билан боғлиқ.
Декабрь ойи охирида Россия ва Хитой ўртасидаги товар айирбошлаш ҳажми 3 фоизга камайиб, 17,8 миллиард долларни ташкил этди. Россиядан Хитойга импорт ҳажми 8,996 миллиард долларни, Хитойдан Россияга экспорт ҳажми 8,808 миллиард доллар бўлди.
2021 йилда Россия ва Хитой ўртасидаги товар айирбошлаш ҳажми 146,887 миллиард долларни ташкил этганди, бу 2020 йилга нисбатан 35,8 фоизга кўпдир.
Россия президенти Владимир Путин ва Хитой етакчиси Си Цзиньпин 2024 йилга бориб мамлакатлар ўзаро товар айирбошлаш ҳажмини йилига 200 миллиард долларгача ошириши кераклигини айтганди.
Financial Times маълумотларига кўра, 2022 йил ноябрига келиб Хитой Россиянинг асосий савдо шеригига айланди, аммо ўша пайтдаги савдога коронавирус чекловлари бунга барибир тўсқинлик қилган.
Reuters агентлигининг хабар беришича, 2022 йилда Россия Хитойга суюлтирилган углеводород газлари ёки суюлтирилган нефть газининг темир йўл экспортини ҳам икки баравар оширди.
Декабрь ва январь ойларида Хитой савдо ва иқтисодий ривожланишга салбий таъсир кўрсатган коронавирусга қарши чора-тадбирларнинг бир қисмини юмшатди.
Хитой ва Россия Ўзбекистоннинг ташқи савдодаги асоси ҳамкорлари ҳам ҳисобланади.
Изоҳ (0)