O‘zbek milliy akademik teatri aktrisasi Vazira Yunusova “Sevimli” telekanalining “Mashhurlar” ko‘rsatuviga bergan intervyusida onasidan ayrilgani, turmush o‘rtog‘i qamalib qolganidan keyin qiyinchiliklarga duch kelgani, salomatligidagi muammolar tufayli operatsiyani boshdan kechirgani haqida so‘zlab berdi.
“Mehnat bilan hamma qiyinchilikni yengsa bo‘ladi”
1998-yili boshimga juda katta tashvish tushgan, onam vafot etgan, bundan tashqari, turmush o‘rto‘gim ham qamalib qolgan, “dekret”da bo‘lganman, yotoqxonada yashaganman. O‘sha kezlari uyda yeyishga non bo‘lmagan, buning ustiga Yaypandan akamning qizini — jiyanimni ham olib kelganman.
Bu jiyanimni o‘zimizning qarindoshimizga turmushga berganmiz. Jiyanimning uddaburonligiga hayron qolganman. Kichkina, ozg‘in qizcha onamdan ko‘rpa qavishni o‘rgangan. Keyin menga kelib ammajon, buni shunday qavisak, pul berar ekan, degan. Bolam uchun buni o‘rganishga kirishib ketganman.
Hayotda qiyinchilik, mehnat bilan bola-chaqa boqsa bo‘ladi. Mehnat bilan hamma qiyinchilikni boshdan kechirsa bo‘ladi. Yengillik bilan topilgan pul osonlikcha ketadi. Keyin ko‘rpa qaviganmiz, boshida qiyshiq qilib qaviganman, olib chiqqanimda rosa xafa bo‘lishgan, qayta olib chiqib, boshqatdan qilganman.
“Allohdan uch nafar farzandim uchun operatsiyadan sog‘-salomat chiqarishini so‘radim”
Ko‘pchilik aktrisalar oshqozonini operatsiya qildirib ozib ketyapti, siz ham olib tashladingizmi, ozib ketibsiz, degan savollar ko‘p bo‘ldi. Yo‘q, men 25-oktabrda, xalqimiz xizmatini qilayotgan vaqtimda o‘t pufagimdagi tosh azob berib, 26-oktabr kuni to‘g‘ri shifoxonaga borganman. Operatsiya bo‘ldim, Allohdan uch nafar farzandim uchun operatsiyadan sog‘-salomat chiqarishini so‘radim. Menga qaragan barcha shifokorlarga minnatdorchiligimni bildiraman. Menga juda yaxshi qarashdi, qo‘llari yengil, chaqqon insonlar ekan. Hozir o‘zimni juda yaxshi his qilyapman.
Izoh (0)