Бухоро вилоятида қурилиш ташкилотига тегишли ҳудудда ноқонуний равишда 4 туп дарахт ва 12 туп бута кесиб ташланган. Бу ҳақда бир гуруҳ фуқаролар “Дарё”га мурожаат қилди.
Келиб тушган мурожаатда айтилишича, Бухоро шаҳридаги Алпомиш кўчасида жойлашган Bukharа Golden House ИЧЖга қарашли ер майдонида дарахтлар ноқонуний кесиб ташланган.
Бухоро вилояти Экология ва атроф-муҳитни муҳофаза қилиш бошқармаси берган маълумотга кўра, ҳақиқатан ҳам қурилишга ажратилган ҳудудда фуқаро О.Қ. томонидан ноқонуний равишда 3 туп шумтол, 1 туп оқтут ва 12 туп оқтут буталари кесилгани аниқланган.
“Натижада 266 миллион 400 минг сўмлик ўсимлик дунёсига зарар етказилган. Фуқаро О.Қ.дан етказилган зарарни ундириш ва унинг хатти-ҳаракатларида жиноят аломатлари борлиги сабабли қонуний чора кўрилишини сўраб, Бухоро шаҳар прокуратурасига хат юборилган”, — дейилади бошқарма ахборотида.
Бош прокуратура ахборот хизматининг “Дарё”га маълум қилишича, ҳозирда ушбу ҳолат юзасидан Бухоро шаҳар прокуратураси томонидан терговга қадар текшириш ҳаракатлари олиб борилмоқда.
Жарима кор қилмаган
Мазкур ҳудудда аввалроқ 2022 йилда ҳам 4 туп дарахт ноқонуний равишда таг қисмидан кесиб ташланган. Яъни 2022 йилнинг апрель ойида фуқаро Х.Ш. Бухоро шаҳар Алпомиш кўчасида қурилишга мўлжалланган объектда дарахтларни кесишга рухсат бериш тўғрисида Давлат хизматлари агентлигига мурожаат қилган. Лекин Бухоро шаҳар бўлими инспекторлари томонидан мурожаат ўрганилиб, рад жавоби хулосаси берилган. Бироқ шунга қарамай, фуқаро Х.Ш қурилиш ишларини бошлаш учун 24 май куни 4 дона дарахтни таг қисмидан кесиб ташлаган. Ҳолат юзасидан фуқарога нисбатан Маъмурий жавобгарлик тўғрисидаги кодекснинг 79-моддаси 1-қисми билан 1 миллион 350 минг сўм жарима ҳамда табиатга етказилган зарар 15 миллион 255 минг сўм жарима солинган.
Атайин қилинмоқда(ми)
“Дарё”га мурожаат қилган фуқароларнинг айтишича, қурилиш ерида дарахтларни атайин қурилишни бошлаш учун кесиб ташланаётган бўлиши мумкин.
“Булар ҳеч кимга қулоқ солишгани йўқ. Иккита уй ўртасида уй қуришмоқчи. Маҳалла қарши. Худдики кимдир дарахтларни кесиб ташалган-у, бунда қурилиш ташкилотининг айби йўқ. Буни ҳамма кўриб, билиб турибди. Лекин тайинли чора кўрилмаяпти”, — деди фуқаролардан бири.
Яна бир фуқаронинг тахмин қилишича, қурувчи жарималарни тўлаб қўйиб, қурилишни бошламоқчи.
Мораторий
Президент Шавкат Мирзиёев раислигида 2021 йилнинг июнь ойида ўтган йиғилишда Ўзбекистонда дарахтларни кесишга мораторий 2024 йилга қадар узайтирилади ва экополиция ташкил этилиши маълум қилинган эди.
“Дарахтларни кесишга мораторий 2024 йилга қадар узайтирилади ва жавобгарлик кескин кучайтирилади.
Барча раҳбарлар бир нарсани аниқ эшитиб олсин: бундан буён бирорта яшил ҳудуд ва жамоат паркида ҳар қандай дарахтларни кесиш қатъиян тақиқланади”, – деган эди давлат раҳбари.
Ҳоким ишдан кетган
Тошкент шаҳрининг Чилонзор туманида 2022 йилнинг июль ойида катта дарахтлар илдизига қурувчилар томонидан шикаст етказилган эди. Дарахтларнинг нобуд қилиниши ортидан президент топшириғига асосан Тошкент шаҳар Чилонзор тумани ҳокими Шавкат Мавлонов ва прокурори Иззатилла Бозоров лавозимидан озод этилган.
Шунингдек, масъулиятсизликка йўл қўйгани учун пойтахт собиқ ҳокими Жаҳонгир Ортиқхўжаевга ва собиқ прокурори Улуғбек Қосимовга қаттиқ ҳайфсан берилганди.
Изоҳ (0)