Buxoro viloyatida qurilish tashkilotiga tegishli hududda noqonuniy ravishda 4 tup daraxt va 12 tup buta kesib tashlangan. Bu haqda bir guruh fuqarolar “Daryo”ga murojaat qildi.
Kelib tushgan murojaatda aytilishicha, Buxoro shahridagi Alpomish ko‘chasida joylashgan Bukhara Golden House ICHJga qarashli yer maydonida daraxtlar noqonuniy kesib tashlangan.
Buxoro viloyati Ekologiya va atrof-muhitni muhofaza qilish boshqarmasi bergan maʼlumotga ko‘ra, haqiqatan ham qurilishga ajratilgan hududda fuqaro O.Q. tomonidan noqonuniy ravishda 3 tup shumtol, 1 tup oqtut va 12 tup oqtut butalari kesilgani aniqlangan.
“Natijada 266 million 400 ming so‘mlik o‘simlik dunyosiga zarar yetkazilgan. Fuqaro O.Q.dan yetkazilgan zararni undirish va uning xatti-harakatlarida jinoyat alomatlari borligi sababli qonuniy chora ko‘rilishini so‘rab, Buxoro shahar prokuraturasiga xat yuborilgan”, — deyiladi boshqarma axborotida.
Bosh prokuratura axborot xizmatining “Daryo”ga maʼlum qilishicha, hozirda ushbu holat yuzasidan Buxoro shahar prokuraturasi tomonidan tergovga qadar tekshirish harakatlari olib borilmoqda.
Jarima kor qilmagan
Mazkur hududda avvalroq 2022-yilda ham 4 tup daraxt noqonuniy ravishda tag qismidan kesib tashlangan. Yaʼni 2022-yilning aprel oyida fuqaro X.Sh. Buxoro shahar Alpomish ko‘chasida qurilishga mo‘ljallangan obyektda daraxtlarni kesishga ruxsat berish to‘g‘risida Davlat xizmatlari agentligiga murojaat qilgan. Lekin Buxoro shahar bo‘limi inspektorlari tomonidan murojaat o‘rganilib, rad javobi xulosasi berilgan. Biroq shunga qaramay, fuqaro X.Sh qurilish ishlarini boshlash uchun 24-may kuni 4 dona daraxtni tag qismidan kesib tashlagan. Holat yuzasidan fuqaroga nisbatan Maʼmuriy javobgarlik to‘g‘risidagi kodeksning 79-moddasi 1-qismi bilan 1 million 350 ming so‘m jarima hamda tabiatga yetkazilgan zarar 15 million 255 ming so‘m jarima solingan.
Atayin qilinmoqda(mi)
“Daryo”ga murojaat qilgan fuqarolarning aytishicha, qurilish yerida daraxtlarni atayin qurilishni boshlash uchun kesib tashlanayotgan bo‘lishi mumkin.
“Bular hech kimga quloq solishgani yo‘q. Ikkita uy o‘rtasida uy qurishmoqchi. Mahalla qarshi. Xuddiki kimdir daraxtlarni kesib tashalgan-u, bunda qurilish tashkilotining aybi yo‘q. Buni hamma ko‘rib, bilib turibdi. Lekin tayinli chora ko‘rilmayapti”, — dedi fuqarolardan biri.
Yana bir fuqaroning taxmin qilishicha, quruvchi jarimalarni to‘lab qo‘yib, qurilishni boshlamoqchi.
Moratoriy
Prezident Shavkat Mirziyoyev raisligida 2021-yilning iyun oyida o‘tgan yig‘ilishda O‘zbekistonda daraxtlarni kesishga moratoriy 2024-yilga qadar uzaytiriladi va ekopolitsiya tashkil etilishi maʼlum qilingan edi.
“Daraxtlarni kesishga moratoriy 2024-yilga qadar uzaytiriladi va javobgarlik keskin kuchaytiriladi.
Barcha rahbarlar bir narsani aniq eshitib olsin: bundan buyon birorta yashil hudud va jamoat parkida har qanday daraxtlarni kesish qatʼiyan taqiqlanadi”, – degan edi davlat rahbari.
Hokim ishdan ketgan
Toshkent shahrining Chilonzor tumanida 2022-yilning iyul oyida katta daraxtlar ildiziga quruvchilar tomonidan shikast yetkazilgan edi. Daraxtlarning nobud qilinishi ortidan prezident topshirig‘iga asosan Toshkent shahar Chilonzor tumani hokimi Shavkat Mavlonov va prokurori Izzatilla Bozorov lavozimidan ozod etilgan.
Shuningdek, masʼuliyatsizlikka yo‘l qo‘ygani uchun poytaxt sobiq hokimi Jahongir Ortiqxo‘jayevga va sobiq prokurori Ulug‘bek Qosimovga qattiq hayfsan berilgandi.
Izoh (0)