Айни вақтда президент Шавкат Мирзиёев Бухоро вилоятининг Шофиркон туманида саноатни ривожлантириш ҳамда қайта тикланувчи энергия манбаларини кенг жорий этиш масалалари бўйича тадбиркорлар билан мулоқот қилмоқда. Бу ҳақда “Дарё” мухбири хабар берди.
Президент туманлардаги янги захираларни ишлатиб, инвестиция олиб келиш, иш ўринларини кўпайтириш масаласига тўхталди.
Давлат раҳбари 2023 йилда Бухорода 880 миллион долларлик 703 та корхона ишга туширилиб, 15 мингта иш ўрни яратилишини айтди.
Президент туман ҳокимлари қўшимча захираларни топиб, янги лойиҳаларни амалга ошириш борасида аниқ мисолларни келтирди.
Жумладан, Қоровулбозор саноати ҳажми 1 триллион сўмга ҳам етмайди. Тумандаги пардозбоп тошлар, гипс ва оҳактош каби 4 та йирик норуда конларга 100 миллион доллар инвестиция жалб қилиб, йилига 200 миллиард сўмлик маҳсулотларни ишлаб чиқаришга салоҳият бор.
Ёки, 4-тоифага кирган Жондор туманида 42 минг тонна пахта етиштирилса-да, бирорта тўқимачилик корхонаси йўқ. Ушбу туманда ҳам, Шофиркондаги каби камида 2 та лойиҳани амалга ошириш учун, етарли салоҳият бор.
Шунингдек, Жондордаги 2 та маҳаллада 40 та хонадон мебелчиликни, яна 3 та маҳаллада 30 та хонадон терига бирламчи ишлов беришни йўлга қўйган.
“Туман ҳокими тадбиркорларга шароит яратиб, ер ва кредит масаласида ёрдам берса, бемалол 20 миллион долларлик 100 дан зиёд кичик лойиҳаларни икки ойда ишга туширса бўлади. Бу борада, саноат зоналари учун, 20 гектардан ортиқ майдон ҳам ажратилган”, — деди Шавкат Мирзиёев
Изоҳ (0)