Тожикистон жануби-шарқида юз берган қор кўчкилари оқибатида 15 киши ҳалок бўлди: 14 киши Тоғли Бадахшон автоном вилоятида, бир киши Душанбе-Варзоб автомагистрали ҳудудида кўчки қурбонига айланди. Бу ҳақда 16 февраль куни Республика Фавқулодда вазиятлар қўмитаси маълум қилди.
Республика жануби-шарқида 13 февралдан 15 февралгача жами 27 та қор кўчкиси қайд этилган. Энг йирикларидан бири Хоруғ шаҳри Носир Хисрав номидаги маҳаллани қамраб олган. Оқибатда тўртта уй бутунлай вайрон бўлган, 35 та уй ва 5 та хўжалик объекти қисман вайрон бўлган. 12 киши турли тан жароҳатлари олган. 400 дан ортиқ хонадон аҳолиси хавфли ҳудудлардан эвакуация қилинган. Зарар миқдори аниқланмоқда.
Тожикистон президенти Имомали Раҳмон ҳалок бўлганларнинг оила аъзоларига ҳамдардлик билдирди. Унинг топшириғига кўра табиий офат оқибатларини бартараф этиш бўйича давлат комиссияси тузилиб, жабрланган оилаларга озиқ-овқат, иссиқ кийим ва зарур уй-рўзғор буюмлари етказиб берилмоқда.
Тоғли Бадахшон автоном вилоятининг кўплаб тоғли ҳудудларида қор кўчкилари кучли қор ёғиши ортидан юзага келган. ФВҚ маълумотларига кўра, Хоруғ ва вилоят туманларида қор қопламининг қалинлиги 20 сантиметрдан 1,2 метргача (тоғли қишлоқларда) ўзгариб турибди.
Тоғли Бадахшонда, Ҳисор тизмаси тоғларида, шунингдек, қатор автомагистрал йўлларда 19 февралгача катта қор кўчкиси ва тошлар юмалаб тушиши хавфи сақланиб қолмоқда. ФВҚнинг қутқарув гуруҳлари қийин ва сирпанчиқ йўлларда кеча-ю кундуз ишлайдиган навбатчилик ташкил этган.
Изоҳ (0)