Қирғизистон Олий суди 13 февраль куни ёпиқ мажлисда республика собиқ президенти Алмазбек Атамбаевга нисбатан илгари чиқарилган ҳукмни бекор қилди ва жиноий ишни қайта терговга юборди, деб хабар бермоқда “Радио Азаттик” суд матбуот хизматига таяниб.
Атамбаев колониядан озод қилинди, деб хабар берди “ТАСС” собиқ президентнинг оиласига таяниб. “Энди биз уйга кетмоқчимиз”, — деган нашр манбаси.
Бу маълумотни Атамбаевнинг маслакдошлари ҳам тасдиқлаган. Уларнинг айтишича, суд Атамбаевнинг Қирғизистондан ташқарида даволанишига рухсат берган.
Маълумот учун 2020 йилда Қирғизистон Олий суди аввалги инстанцияларнинг ҳукмларини бекор қилган эди — уларга мувофиқ Атамбаев 11 йилга қамалганди. Аммо 2021 йил октябрь ойида Олий суд Бош прокуратура аризасидан сўнг ўз қарорини бекор қилди ва Атамбаев яна судланган деб топилди. Шундан сўнг 2022 йил 15 мартда Олий суд Атамбаевга нисбатан 11 йиллик қамоқ жазосини ўз кучида қолдирди.
Изоҳ (0)