Брюсселда жойлашган Bruegel тадқиқот ташкилоти ҳисоб-китобларига кўра, Европа давлатлари расмийлари аҳоли ва корхоналарни электр энергияси нархининг кескин ошишидан ҳимоя қилиш учун 792 миллиард евро ажратган.
Ноябрь ойида эълон қилинган аввалги ҳисобот билан солиштирганда, бу миқдор 86 миллиард еврога ошган.
Ҳисоботда таъкидланганидек, умумий сумманинг 268,1 миллиард евроси фақатгина Германияга тўғри келади, ажратилган маблағлар миқдори бўйича Европанинг бошқа ҳеч бир давлати билан солиштириб бўлмайди.
Бу рейтингда барча Европа давлатлари орасида иккинчи ўринда Буюк Британия (103,3 миллиард евро) жойлашган. Кейинги ўринларда Италия (99,3 миллиард евро) ва Франция (92,1 миллиард евро). Аксарият Европа давлатларининг харажатлари 10 миллиард евродан ошмайди.
Шу билан бирга, ялпи ички маҳсулотдан ажратилган маблағлар улуши бўйича Словакия биринчи ўринда туради, у аҳоли ва корхоналарни электр энергиясининг юқори нархларидан ҳимоя қилишга ЯИМнинг 9,3 фоизини сарфлайди. Германия бу эҳтиёжлар учун ялпи ички маҳсулотнинг 7,5 фоизига тенг миқдорда маблағ ажратди.
Европа ҳукуматлари ушбу маблағларнинг аксариятини тўғридан тўғри истеъмол нархларини ушлаб туришга йўналтирган.
Бунга асосан ёнилғи учун ҚҚСни пасайтириш ёки электр энергияси тарифларини сунъий равишда чеклаш орқали эришилди.
Изоҳ (0)