АҚШ президенти Жо Байден Польша раҳбари Анжей Дуда ва мамлакат халқига Россия босқини бошиданоқ Украинага ёрдам беришдаги катта роли учун шахсан миннатдорлик билдириш мақсадида Польшага ташриф буюради. Бу ҳақда Вашингтондаги брифингда Оқ уй Миллий хавфсизлик кенгаши координатори Жон Кирби маълум қилди.
Кирбининг таъкидлашича, бу сафар Оқ уй раҳбари учун муҳим аҳамият касб этади.
“У Польша ва НАТОнинг бошқа кўплаб аъзолари ҳозирда кўрсатаётган жасорат ва бирлик қанчалик муҳим экани ҳақида гапирмоқчи”, — деди Кирби. “Афсуски, тез орада кенг кўламли урушнинг иккинчи йили бошланади”, — деб қўшимча қилди у.
“Польша кучли иттифоқчи, Украинанинг йирик тарафдори ва нафақат АҚШ қўшинларини, балки миллионлаб украиналик қочқинларни ҳам сахийлик билан қабул қилди”, — дея таъкидлади Кирби.
Январь ойи охирида Оқ уй Украинадаги урушга бир йил тўлиши муносабати билан сюрприз тайёрлаётганини маълум қилганди.
Аввалроқ Польша ва Латвия раҳбарлари февраль ойида Байден Марказий Европага ташриф буюришини айтганди. Польша оммавий ахборот воситаларида Украина, Польша ва АҚШ президентларининг учрашуви Польшада бўлиши мумкинлиги ҳақида хабарлар тарқалди. Бироқ Украина президенти Владимир Зеленский ҳали учрашувга таклифнома олмаганини айтди.
Изоҳ (0)