Meta менежерларидан самаралироқ ишлашни ёки корпорацияни тарк этишни сўради — Bloomberg

Meta корпорацияси менежерлар ва раҳбарлардан компания фаолиятига кўпроқ ҳисса қўшишни ёки уни тарк этишни сўради. Бу ҳақда Bloomberg хабар берди.

Агентлик маълумотларига кўра, Meta саноатдаги инқироз шароитида ўз самарадорлигини ошириш ва харажатларни камайтиришга ҳаракат қилмоқда.

Аввалроқ компания ўз ходимларининг 13 фоизини ишдан бўшатган, бироқ корпорация раҳбари Марк Цукерберг ҳамон Meta “жуда секин ишлаяпти” деб ҳисоблайди. Шу сабабли, у 2023 йилни “самарадорлик йили” деб атади.

Шунингдек, у ўрта даражадаги менежерларни қисқартиришга ва самарасиз лойиҳалардан воз кечишга ваъда берди.

Аввалроқ Meta акциялари сезиларли даражада қулаши натижасида Цукербергнинг бойлиги 11 миллиард долларга қисқаргани ҳақида хабар берилган эди.

Гап шундаки, пандемия даврида Meta акциялари кескин ўсган ва 2021 йил сентябрида энг юқори чўққига чиққан. Ўшандан бери акциялар 74 фоизга арзонлашди ва Facebook асосчиси тахминан 100 миллиард доллар йўқотди.