SpaceX компанияси (Starlink сунъий йўлдош интернет тармоғига эгалик қилади) раҳбари Илон Маск Starlink терминаллари туфайли Украинадаги урушнинг кучайишига йўл қўймаслигини айтди.
Унинг сўзларига кўра, Starlink тармоғидан интернетга уланишнинг бошқа йўли бўлмаган фронт чизиғида фойдаланилмоқда.
“Аммо биз учинчи жаҳон урушига олиб келиши мумкин бўлган кескинликка йўл қўймаймиз”, — деб ёзди Маск Twitter’да.
Маск уни Starlinkънинг Украинада тўлиқ ишлашини тиклашга чақирган фойдаланувчилардан бирининг постига шундай жавоб қайтарди. У Starlink терминалларидан ҳарбий мақсадларда фойдаланмаслик лозимлигини қайд этди.
Февраль ойи бошида SpaceX компанияси Украина ҳарбийлари учун дронларни бошқаришда Starlink тармоғидан фойдаланишни тақиқлади.
“Биламизки, ҳарбийлар уларни алоқа учун ишлатишади ва бу нормал ҳолат. Аммо биз ҳеч қачон ундан тажовузкор мақсадларда фойдаланиш ниятида бўлмаганмиз”, — деди компания президенти Гвинн Шотвелл.
Украина президенти офисининг маслаҳатчиси Михаил Подоляк SpaceX компаниясидан “ё Украина ва эркинлик ҳуқуқи томонда”, ёки Россия томонда бўлиш ҳақида бир қарорга келишни сўради.
Январь ойи ўрталарида мамлакат бош вазири ўринбосари – рақамли трансформация вазири Михаил Федоров Украинада 30 мингта Starlink терминали борлигини айтганди.
Изоҳ (0)