Қозоғистонда кучли ёғингарчилик сабабли вилоят ва шаҳарларни сув босди (видео+фото)
Қозоғистонда кучли ёғингарчилик сабабли Туркистон, Кентау шаҳри ва Туркистон вилоятини сув босди. Бу ҳақда Tengrinews хабар берди.
Маълум қилинишича, кўчаларни сув босиши тоғли ҳудудларда ёмғир кўринишидаги ёғингарчилик ва кучли қор эриши натижасида сув сатҳининг кўтарилиши, сўнгра ёнбағирдан тошиши оқибатида юзага келган. Сув тошқинларига қарши курашга Мудофаа вазирлиги ҳарбий хизматчилари ҳам жалб қилинган.
Қуролли Кучлар тизимидаги 44859-сонли ҳарбий қисмнинг 100 нафар аскари, 7-ўт ўчириш бўлинмаси шахсий таркиби, “Яшил ариқ” мутахассислари, ёшлар ресурс маркази кўнгиллилари бу ишга жалб қилинган. Навбатчи постларда дарё оқими ва сув сатҳи назорат қилинмоқда.
Таъкидланишича, қор эриши ва ёғингарчилик энг катта табиий Кабилсай каналининг тошиб кетишига олиб келган. Фавқулодда вазиятлар вазирлигининг қутқарув бўлинмалари туни билан тошқиннинг олдини олишга ҳаракат қилган. Қутқарувчилари томонидан 204 нафар фуқаро ва 201 бош қорамоллар эвакуация қилинган.
