Канада парламенти Хитойнинг Шинжон ҳудудидан икки йил ичида Канадага 10 минг уйғур қочқинни жойлаштириш бўйича таклифни маъқуллади. Бу ҳақда Reuters хабар берди.
Либерал депутат Самир Зубери томонидан ишлаб чиқилган қонун лойиҳаси Канада ҳукуматини унга риоя қилишга мажбурламайди. Зуберининг қонун лойиҳасига 322 киши овоз берган, сиёсатчи Канада ҳукуматини учинчи давлатларга қочган уйғурлар ва бошқа этник туркий мусулмонлар Хитойдан “босим”га дуч келаётганини тан олишга чақирган.
Бироқ, Бош вазир Жастин Трюдо ҳукумати парламентнинг бир овоздан қўллаб-қувватлаганини ҳисобга олиб, чора кўриши керак бўлади.
“Канада ҳар доим ҳимояга муҳтожларга ёрдам бериш учун ўз ҳиссасини қўшади. Мен парламент томонидан қабул қилинган таклифда кўрсатилган чора-тадбирларни илгари суриш учун барча партия аъзолари билан ишлашга қатъий қарор қилдим”, — деди Иммиграсия вазири Шон Фрэйзер баёнотида.
2021 йилда Канада Хитойдаги “уйғур геноциди” бўйича ўз позициясини билдирган биринчи давлатлардан бири бўлди. 2022 йилда эса Канада Хитойнинг Шинжондаги мусулмонларга нисбатан инсон ҳуқуқларини поймол этаётгани ҳақида БМТда мунозара ўтказишга уринган давлатлар қаторига кирди.
Мавзуга доир: БМТда Шинжондаги уйғурларга нисбатан жиноятларни текширишга 19 та давлат қарши чиқди, улар орасида Ўзбекистон ва Қозоғистон ҳам бор
Изоҳ (0)