Германия Путиннинг “немис танклари Россияга таҳдид солиши” ҳақидаги баёнотига жавоб қайтарди

Германия ҳукумати вакили Штеффен Гебештрейт Россия президенти Владимир Путиннинг “Россия яна немис танклари таҳдидига дуч келди” деган баёнотига жавоб қайтарди. Бу ҳақда Tagesschau хабар берди.

Унинг сўзларига кўра, мазкур баёнот Путин Украинага қарши тажовузни оқлаш учун ишлатаётган “мавҳум тарихий таққослашлар”дир. Россия президенти Сталинград жанги тугаганининг 80 йиллигига бағишланган маросимдаги нутқида Россияга Иккинчи жаҳон урушидаги каби “немис танклари яна таҳдид” солаётганини айтганди. Бундан ташқари, у “Германия Россияга қарши урушга жалб қилинмоқда” деб таъкидлаган.

Гебештрейт Германия ва бошқа Ғарб ҳамкорлари Украинага ёрдам ва хизматлар етказиб бериш билан шуғулланаётганини, бироқ бу “урушда иштирок этиш”ни англатмаслигини қайд этди.

25 январь куни Германия Украинага 14 та Леопард 2 танки беришини, шунингдек, бошқа давлатларга ҳам немис танкларини Киевга етказишга рухсат берганини таъкидлади. Шу куни АҚШ президенти Жо Байден Украинага Abrams танкларини етказиб берилишини эълон қилди. Кремл Украинага танклар етказиб берилишига муносабат билдириб, бу урушга аралашиш эканини маълум қилди.