Польша ТИВ Украинадаги урушнинг энг ёмон ҳолда тугайдиган сценарийсини маълум қилди
Украина Россия устидан ҳарбий ғалаба қозонган тақдирдагина Европа шарқида барқарор тинчлик ўрнатилиши мумкин. Бу ҳақда Польша ташқи ишлар вазири ўринбосари Павел Яблонский RMF FMда гапирди.
Сиёсатчининг сўзларига кўра, Кремлга “юзини сақлаб қолиш” имконини бериш энг ёмон сценарий ҳисобланади.
“Европадаги ҳар қандай барқарор тинчликнинг шарти шундаки, Украина Россияни ўз ҳудудидан чиқариб юбориши керак”, — дейди у.
Дипломат Польша урушда Россия “мағлубиятга учраган, саросимага тушган” ва жавобгарликка тортиладиган ҳолатда чиқишини исташини билдирди.
“Агрессорнинг бу можародан юзи ёруқ ҳолда чиқиб кетиши энг ёмон сценарий бўлади. Бу нафақат бизнинг хавфсизлигимизга, балки глобал миқёсда таъсир қилади. Шунингдек, агрессив потенциал иштирокчиларга Россия тутган йўл самарасини беришига ўргатади”, — таъкидлади Яблонский.
Польша ТИВ вакили Россия ҳамон Иккинчи жаҳон уруши давридаги тамойилларга амал қилиши, бу 70-80 йил аввал содир бўлган воқеаларнинг давоми эканини қўшимча қилди.
Мавзуга доир:
- Украина разведкаси Россия билан уруш февралда қандай кечишини прогноз қилди
- Зеленский офиси Россия билан урушни тугатиш сценарийсини маълум қилди
