Беларусь президенти Александр Лукашенко уч кунлик давлат ташрифи билан Зимбабвега келди. Бу Беларусь президентининг Саҳрои Кабир жанубидаги Африка давлатига биринчи ташрифи, деб хабар бермоқда Euronews.
Хараре аэропортида Беларусь президентини Зимбабве раҳбари Эммерсон Мнангагва ва ҳукмрон партиянинг беш мингга яқин тарафдорлари кутиб олди.
Зимбабве Ташқи ишлар вазирлиги маълум қилишича, икки давлат раҳбарлари ўртасида режалаштирилган музокаралар сиёсат, тоғ-кон ва қишлоқ хўжалиги каби соҳаларда икки давлат ўртасидаги “мавжуд ажойиб муносабатлар”ни мустаҳкамлашга қаратилган.
Мутахассислар бу икки давлатни бирлаштириб турган омил Ғарбнинг уларга нисбатан қўйган санкциялари эканини таъкидлайди. “Ғарб томони мамлакатларимизни жазоламоқчи, аммо улар бунга эриша олмайди, чунки икки давлатнинг ривожланиш стратегияси ўзимизни ўзимизни таъминлашга қаратилган”, — деди Хараре провинциясидаги ЗАНС-ПФ партияси раиси Годвилс Масимирембва.
Санкциялар билан бир қаторда икки президентни уларга нисбатан инсон ҳуқуқларини бузиш, жумладан, мухолифатни куч билан бостириш айбловлари ҳам бирлаштиради. Мутахассисларнинг фикрича, дипломатик изоляция шароитида ҳар икки давлат халқаро муносабатларини диверсификация қилишга интилмоқда.
”БелТА” агентлиги хабарига кўра, Лукашенконинг ташрифи доирасида Зимбабве ва Беларусь ўртасида ҳамкорлик бўйича қўшма доимий комиссия тузиш тўғрисидаги битимлар, жумладан, инвестицияларни рағбатлантириш ва биргаликда ҳимоя қилиш, ҳамкорлик бўйича қўшма доимий комиссия тузиш тўғрисида, таълимга оид ҳужжатларни ўзаро тан олиш тўғрисидаги англашув меморандуми, икки томонлама солиққа тортишнинг олдини олиш ва солиқ тўлашдан бўйин товлашнинг олдини олиш тўғрисида келишувларни имзолаган.
Томонлар Беларусь трактори ва ғалла йиғим-терим техникаси, шунингдек, дон сақлаш комплексларини қуриш ва модернизация қилиш учун ускуналар етказиб бериш бўйича шартномалар имзолаган.
Бундан ташқари, Минск ва Хараре шаҳарлари ўртасида қардошлик муносабатлари ўрнатилиши ҳақида эълон қилинди.
Изоҳ (0)