Британия ядровий кемаси супер елим билан таъмирлангани аниқланди. Ҳолат бўйича тергов бошланди
Буюк Британиянинг ядровий сув ости кемаси мурватлари супер елим ёрдамида мустаҳкамлангани аниқланди. Бу ҳақда манбаларга таяниб, The Sun хабар берди.
Маълум қилинишича, Вангуард сув ости кемасини текшириш чоғида ядро реактори учун совитиш суюқлиги солинган қувурлардаги мурватлардан бирининг синган боши топилган. Кейинчалик бундай мурватлар сони камида еттита экани маълум бўлган.
Плимутдаги базадаги ишчилар мурватларни мустаҳкамлаш пайтида уни синдириб юборган. Бироқ, синган мурватларни бурғилаш ва уларни янгилари билан алмаштириш ўрнига, ишчилар шунчаки супер елимдан фойдаланган. The Sunънинг ёзишича, базадаги ишлар белгиланган режадан тўрт ойга ортда қолмоқда. Эҳтимол, ишчилар таъмирлаш муддатларини бузмаслик учун супер елимдан фойдаланишга қарор қилган. Шу билан бирга, сув ости кемасини таъмирлаш учун Британия бюджетидан тахминан 300 миллион фунт стерлинг ажратилган.
Воқеадан кейин Британия Мудофаа вазири Бен Уоллес ғазабланган. Пудратчи компания ядровий сув ости кемасини таъмирлаш пайтидаги қонунбузарликлар учун шахсан унга ҳисобот берган.
Денгиз флоти манбаларидан бири вазиятни “шармандали” деб атаган ва “Ядро стандартлари ҳеч қачон бузилмаслигини” айтган. Сувости кемасининг собиқ капитани Райан Рамсай эса яна нималар шундай таъмирланган бўлиши мумкинлиги ҳақидаги савол уни ўйлантиргани таъкидлаган.
Ҳозирда Британия ҳарбий-денгиз кучлари пулни тежашга ва супер елимга мурват ёпиштиришга қарор қилган айбдор ишчиларни тергов қилмоқда ва қидирмоқда. The Sun манбаларига кўра, носозлик юз берган тақдирда реактор портламаган бўларди, бироқ таъмирлаш ҳолати умуман сув ости кемасининг ишончлилиги борасида саволлар туғдирмоқда.
Британия қироллик денгиз флотида ҳозирда Vanguard синфидаги тўртта сув ости кемаси бор. 2028 йилдан бошлаб улар Trident ядровий ракеталари билан қуролланган Dreadnought синфидаги тўртта сув ости кемасининг янги авлоди билан алмаштирилади. Vanguard сув ости кемаси 16 тагача ядровий ракеталарни олиб юриши мумкин, уларнинг ҳар бири саккизтагача Trident каллаклари билан қуролланган.
