Россия президенти Владимир Путин Борис Жонсон билан суҳбатида ракета билан таҳдид қилмаган, Буюк Британия собиқ бош вазирининг бу ҳақдаги сўзлари “тушуниб, тушунмай” айтилган ёлғон, деди Россия президенти матбуот котиби Дмитрий Песков журналистларга.
“Йўқ. Жонсон айтган гаплар ҳақиқатга тўғри келмайди. Аниқроғи, бу ёлғон”, — деди Песков.
У Буюк Британия собиқ бош вазири бу ҳақда тушуниб ё тушунмай алдаган бўлиши мумкинлигини қўшимча қилди. “Ёки бу онгсиз ёлғон бўлган, Жонсон аслида президент Путин у билан нима ҳақда гаплашаётганини яхши тушунмаган. Президентимизнинг суҳбатдоши учун ўзимизни ноқулай ҳис қиляпмиз ”, — давом этди Песков.
“Ҳеч қандай ракета таҳдиди бўлмаган. Россия хавфсизлигига оид муаммолар ҳақида гапира туриб Путин Украина НАТОга қўшилган тақдирда, бизнинг чегараларимизда НАТО ёки Америка ракеталарининг жойлаштирилиши ҳар қандай ракета бир неча дақиқада Москвага етиб боришини англатишини таъкидлаганди” — деди президент матбуот котиби.
“Путин Ғарбга қарши” ҳужжатли фильмида Жонсон Россия президенти билан 2022 йилнинг февраль ойида, яъни уруш бошланишидан сал олдинроқ телефонда гаплашгани, суҳбат жуда узун ва ноодатий бўлгани ҳақида айтиб берганди. Суҳбатда Жонсон Путинни Украинадаги уруш ҳалокатли бўлиши, Ғарб санкцияларига ва Россия чегаралари яқинида НАТО кучларининг кўпайишига олиб келиши ҳақида огоҳлантирган. Бунга жавобан, Жонсоннинг сўзларига кўра, Путин ракета зарбаси билан таҳдид қилган.
“Бир пайт у менга қандайдир тарзда таҳдид қилиб шундай деди: Борис, сизни хафа қилишни хоҳламайман, лекин ракета билан бунга бир дақиқа етарли бўлади”, — деди Жонсон Россия президентнинг сўзларини келтириб.
Изоҳ (0)