20 январь куни “Дарё” интернет-нашрида автомобилларга фара ва чироқлар ишлаб чиқаришга ихтисослашган Uz Chasys МЧЖ ўтказган тендер шубҳали экани, рақобатчилар қариндошлик алоқалари билан боғланган бўлиши ҳақида материал эълон қилинганди. Uz Chasys корхонаси таҳририятга хат йўллаб, тендер юзасидан тузилган шартнома бекор қилинганини маълум қилди.
Божхона терминалларидан келиб тушган юкларни олиб тушиш, кўтариш хизматини бажариш бўйича бошланғич қиймати 474 миллион сўм бўлган тендерда иккита тадбиркорлик субъекти иштирок этганди. And Cargo Trans Service ва Zafarbek Cargo Trans Servis номли корхоналар ўртасидаги рақобатда иккинчи МЧЖ 457 миллион 800 минг сўм билан ғалаба қозонган.
Ғолиб корхона манзили Андижон вилояти Жалолқудуқ тумани Жалолқудуқ шаҳарчаси, Намуна кўчаси деб кўрсатилган. Раҳбар — Исманов Нуриддин Ғуломжанович. Таъсисчи эса Исманов Мухиддин Ғуломжанович.
Мағлуб МЧЖ And Cargo Trans Service’нинг раҳбари бошқа — Кимсанбоев Давронбек Иброхимжонович. Аммо манзили Андижон вилояти Жалолқудуқ туманида деб кўрсатилган корхонанинг таъсисчиси Исманова Фатмахон Игембердиевна.
Мақолада Исманов Мухиддин ва Исманова Фатма қариндош бўлиб чиқиши эҳтимоли ҳақида сўз борган.
Мавзуга доир: Ўзини ўзи енгган тадбиркор, қариндошига ёрдамлашган ҳакам, тугатилган корхонанинг иштироки — 20 январдаги шубҳали тендерлар
Uz Chasys тақдим этган баённомага кўра, танлов натижаси шубҳали бўлгани сабабли икки иштирокчидан қўшимча ҳужжатлар тақдим этиш сўралган. Лекин иштирокчилар томонидан рад жавоби олингандан сўнг, ушбу икки корхонанинг СТИР рақамлари орқали текширув ва суриштирув ишлари олиб борилган.
Натижада таъсисчилар ва уларнинг устав фондидаги улуши ҳақида маълумотларига кўра бир оилага тегишли бўлган Исманов Мухиддин Гуламжанович ва Исманова Фатмахон Игембердиевна 100 фоиз улуш билан афилланган шахслар экани ва “Давлат харидлари тўғрисида”ги қонуннинг 14-моддасида (манфаатлар тўқнашуви) кўрсатилган қонун бузилишига олиб келиши аниқланган.
“Шуни айтиб ўтиш керакки, икки корхона ва тендер комиссияси аъзоларининг ҳеч қандай боғлиқлик томонлари мавжуд эмас”, — дейилади баённомада.
Натижада иштирокчилар ушбу тендерни қабул қилмаслигини ва танловни рад этишини маълум қилган. МЧЖлар раҳбарлари тақдим этилган нархлардан воз кечиб, тендерни бекор қилишга ўзаро келишиб олган.
Изоҳ (0)