“ССВ қошидаги IT Med компанияси устидан текширув бошланди” — Амрилло Иноятов

Соғлиқни сақлаш вазирлиги ҳузуридаги IT Med компаниясига нисбатан текширув ишлари бошланди. Бу ҳақда вазир Амрилло Иноятов Коррупцияга қарши курашиш агнетлиги томонидан ўтказилган анжуманда маълум қилди, дея хабар бермоқда “Дарё” мухбири.

IT Med жамияти Соғлиқни сақлаш вазирлигининг ахборот-коммуникация технологиялари, телемедицина ва масофавий таълимни жорий этиш ва ривожлантириш бўйича масъул муассаса ҳисобланади.
Амрилло Иноятовнинг айтишича, IT Med устидан текшириш ишлари бошланган.
“Улар ҳаммаси, барча қилган ишларига жавоб беради. Ташкилот нафақат онкологик касалликлар рўйхатини электрон реестрини ишлаб чиқиш, бундан ташқари жуда кўп вазифалар олдида турибди, деярли бирортаси бажарилмаган”, — деди вазир.

Унинг алоҳида таъкидлашича, IT Med ташкил этилганига уч йил вақт бўлган ва шу муддат ичида нима ишлар қилган бўлса, барчаси қаттиқ текширувдан ўтказилади.

“Ташкилотда шу кеча-кундузда 60 нафар одам ишлаяпти. Бир ойда қарийб 450-500 млн сўм маошлар учун тақсимланади. Охирги уч йиллик учун ҳар бири жавоб беради: булар нима учун ойлик олган, қайси вазифани бажарган, қайси вазифани бажармаган ва нима учун бажармаган”, — дея Амрилло Иноятов.

Мавзуга доир:

Ходими пора олгани учун Республика тез тиббий ёрдам маркази Андижон филиали директори лавозимидан озод этилди

“Тиббий экспертизада ўғлимнинг буйраги ва жигари ишдан чиққани маълум бўлди” — “Док-1 Макс” дан вафот этган қашқадарёлик боланинг отаси