Ўзбекистон ва Қирғизистон фуқаролари эндиликда икки давлатга ID-карта орқали ўтиши мумкин бўлади. Бу ҳақда ЎзА хабар берди.
Қайд этилишича, Шавкат Мирзиёевнинг Қирғизистонга давлат ташрифи давомида “2006 йил 3-октябрда имзоланган Ўзбекистон Республикаси ҳукумати билан Қирғизистон Республикаси ҳукумати ўртасида имзоланган фуқароларнинг ўзаро бориб-келишлари тўғрисида”ги битимга ўзгартиришлар киритиш тўғрисида баённома ҳам алмашинилган.
Унга кўра, эндиликда Ўзбекистоннинг барча фуқаролари Қирғизистонга, худди шундай Қирғизистон фуқаролари Ўзбекистонга ID-карта орқали киришлари мумкин бўлади (илгари фақат хорижга чиқиш паспорти билан мумкин эди).
Фуқароларнинг чегарадан кириш-чиқиши ҳақидаги маълумотлар электрон тарзда қайд этилади, паспортга штамп босишга ҳожат қолмайди. Ушбу енгиллик исталган транспорт орқали (самолёт, поезд, автомобиль, автобус ва ҳк) чегарани кесиб ўтишда амал қилади.
Мазкур тартиб имзоланган ҳужжатлар иккала давлат томонидан тегишли тартибда тасдиқланган сўнг кучга киради. Бу тахминан 1—2 ой вақт олиши маълум қилинмоқда. Ушбу тартиб айниқса Ўзбекистоннинг эксклав ҳудудлари бўлган Сўх, Шоҳимардон, Чўнғара каби ҳудудларидаги фуқаролар учун енгиллик бўлади, уларнинг чегарадан ўтишларидаги ортиқча бюрократияга чек қўяди.
Изоҳ (0)