Қашқадарёда хотинини рашк қилган эр уни арралаб ўлдирди
Қашқадарё вилоятининг Қарши туманида хотинини рашк қилган эр уни занжирли арра билан ўлдирди. Бу ҳақда “Менинг юртим” телеканалининг “Марказий студия” дастурида хабар берилди.
Маълум бўлишича, қотиллик воқеаси 2023 йилнинг 25 январь куни тушдан сўнг рўй берган.
2023 йилнинг 25 январь куни эрталаб соат 08:00 дан 13:00 гача мактабда навбатчи эдим. Навбатчилик пайтим мактаб биносига бегона киши кирмади. Яъни ҳамкасбимизнинг эри мактаб биносига келмади. Лекин ҳамкасбимиз бешинчи соатдаги дарсидан сўнг чиқиб кетди. Тушдан сўнг ҳам дарси бор деб уни кутдик, лекин келмади. Кейин билсак, шу воқеа рўй берган экан, — дейди марҳума фаолият юритган Қарши туманидаги 34-мактаб ўқитувчиси Гулноза Собирова.
Қотиллик содир этилган маҳалла масъулларининг маълумот беришича, эр-хотин ўртасида аввалдан келишмовчилик бўлган. Фаоллар уларни яраштиришга уринган. Аммо аёли ҳақида турли гумонда бўлган эр хотини билан ярашишни хоҳламаган.
“Тараққиёт” маҳалласи фаоли Дилнавоз Ҳамроеванинг айтишича, марҳума турмуш ўртоғи билан жанжали сабаб беш-олти ойдан бери ўз хонадонида алоҳида яшаб келган.
“Тараққиёт” МФЙ раиси Эргаш Худоқуловнинг маълумот беришича, марҳума рашк сабаб ўлдирилган.
Хотинининг телефони эрига уланган экан. Эри хотинини ҳар хил йигитлар билан гаплашади деб гумон қилган. Хуллас, жанжалга шу рашк сабаб бўлган, — дейди МФЙ раиси.
Раиснинг қўшимча қилишича, қотиллик ҳақида унга хотинини арралаб ўлдиргани айтилаётган эркакнинг отаси хабар берган.
Марҳума аёлнинг қайнотаси бизга телефон қилди ва бизни чақирди. Мен ва профилактика инспектори тезда етиб бордик. Борсак, хотинини ўлдирган эр воқеадан сўнг ота-онасига телефон қилиб, қилган ишини айтибди ва ИИБга кетибди. Аёл уйда ерда ётган экан, эр хотинини бензопила билан елкасидан кесган экан-да, — дейди Эргаш Худоқулов.
Қашқадарё вилоят прокуратураси ахборот хизматининг “Дарё” сўровига жавобан маълумот беришича, 37 ёшли аёлини ўлдирган 41 ёшли эркак қўлга олинган бўлиб, ҳолат юзасидан Жиноят кодексининг 97-моддаси 1-қисми (қасддан одам ўлдириш) билан жиноят иши қўзғатилиб, Қарши туман прокуратураси томонидан дастлабки тергов ҳаракатлари олиб борилмоқда.
