Ўзбекистонда ҳукумат таркибида йиллар давомида янги ташкилотлар тузилиши оқибатида пала-партишлик юзага келган эди. Бу эса турли бўғиндаги давлат ташкилотларида бир-бирини такрорловчи функциялар кўпайишига олиб келди. Аниқ тизим йўқолиб қолди, бўйсунув схемаси ҳам тушунарсиз ҳолга келди. Маъмурий ислоҳотлар натижасида қатъий вертикал бошқарув тизими жорий этилмоқда. Бошқача айтганда “қўл бошқаруви”дан тизимли таҳлил асосидаги ривожланишга ўтилади.
Мазкур масалаларни тартибга солиш юзасидан президент Шавкат Мирзиёевнинг “Янги Ўзбекистон маъмурий ислоҳотларини амалга ошириш чора-тадбирлари тўғрисида”ги фармони имзоланди.
Эндиликда вазирлик ва идоралар қисқарган таркиб билан қандай ишлайди, қисқаришга тушган ходимларнинг тақдири нима бўлади ва бу ислоҳотлар қай даражада ўзини оқлайди? Шу ва бошқа саволларга президент ҳузуридаги Давлат хизматини ривожлантириш агентлигининг масъул ходимлари “Дарё” мухбирига берган интервьюсида жавоб берди.
Агентлик департамент мудири Алишер Эрановнинг айтишича, эндиликда вазирларнинг мустақиллиги оширилмоқда.
“Бу дегани ваколат ёки ҳуқуқ эмас, уларни масъулияти ва қарор қабул қилиш усули ўзгармоқда. Аввал ҳар битта вазир ёки раҳбарни муайян битта қарор қабул қилиши учун ҳукумат таркибида котибиятлар, департаментлар котибиятга чиқиб, улар билан келишган, яъни бюрократия бор эди. Ва табиийки бу қарор қабул қилишни кечиктирган. Бугун қабул қилиниши керак бўлган қарор бир ҳафта ёки ўн кунга чўзиларди. Тайинки, ушбу ҳолат унинг натижасига салбий таъсир кўрсатарди. Шу боис вазирларни бош вазир билан тўғридан тўғри ишлайдиган механизм ташкил қилдик. Эндиликда вазир ўз қарорини қабул қилишда ҳукумат раҳбари билан ҳеч қандай босқичларсиз ишлашга ўтилмоқда”, — деди Алишер Эранов.
Унинг алоҳида таъкидлашича, вазирлар ишлаб чиқаётган иш дастурларини жамоатчилик билан келишган ҳолда амалга татбиқ этади.
“Масалан, муайян бир соҳада амалга оширилиши керак бўлган ишни қандай қилиш керак, нима қилиши ва қаерда қилиниши юзасидан жамоатчилик фикри ўрганилади. Ва ўз навбатида дастурнинг ижроси бўйича ҳам жамоатчиликка ҳисоб берадиган тизим яратилмоқда”, — деди агентлик масъул ходими.
Алишер Эрановнинг қўшимча қилишича, вазирларга кадрлар билан ишлашда ҳам тўлиқ мустақиллик берилмоқда.
Мавзуга доир:
Изоҳ (0)