“Биринчи резинотехника заводи”нинг 100 фоиз улуши Россиянинг “Татнефть” компанияси 80 млн долларга сотилди. Бу ҳақда “Ўзкимёсаноат”нинг матбуот хизмати хабар бермоқда.
Таъкидланишича, заводнинг барча кредит мажбуриятлари ҳамда мавжуд қарздорликлар ҳисобга олиниб, “Deloitte” компанияси томонидан қиймати 843 млрд сўмга (экв 75,0 млн доллари) баҳоланган.
2022 йил 31 декабргача ушбу заводнинг 91,8 фоиз улуши “Ўзкимёсаноат” га ва 8,2 фоиз улуши “Ўзкимёимпекс”га тегишли эди. Шунингдек, мазкур корхонанинг жами 153 млн долларга тенг кредит мажбуриятлари ҳамда қарздорлиги мавжуд.
Маълумотларга кўра, 2022 йилнинг 1—2 декабрь кунлари Самарқанд шаҳрида ўтказилган Ўзбекистон—Россия бизнес-форумида заводни мамлакатнинг “Татнефть” компаниясига 80 млн долларга сотиш юзасидан келишувга эришилган.
Бунда заводнинг 100 фоиз улушини мавжуд барча кредит мажбуриятлари ва қарздорликларини бажариш, келгусида корхонада янги турдаги резинотехника маҳсулотларини ишлаб чиқаришни йўлга қўйиш шарти қўйилган.
Компаниянинг хабарига кўра, аввалроқ Ягона корпоратив ахборот порталига жойланган заводнинг 91,8 фоиз улуши 826,6 миллион сўмга сотилгани ҳақидаги хабарда рақамлар хато берилган. Кейинчалик компания постни ўчириб ташлаган ва сумма 826,57 млрд сўмга тузатилган.
Завод ҳақида
“Биринчи резинотехника заводи” 2014 йилда ташкил этилган. 2018 йил июль ойидан бошлаб завод йиллик 100 минг погон метр конвеер ленталари, 200 минг дона қишлоқ хўжалиги шиналари ва 3 миллион дона автомобиль шиналари ишлаб чиқариш қувватига эга.
Изоҳ (0)