2022 йилда Тошкентда ўртача ижара нархи 34,6 фоизга ошди

Ўзбекистон пойтахтида декабрь ойида ижара нархлари қандай ўзгаргани маълум бўлди. Бу ҳақда “Дарё”га Иқтисодий тадқиқотлар ва ислоҳотлар маркази хабар берди.

Тошкентда уй-жой ижараси нархларининг ўзгариши

Пойтахтда декабрь ойида ижаранинг ўртача нархи деярли ўзгармади ва 1 квадрат метр учун 9,9 долларни ташкил этди. 

Энг юқори ижара нархи Шайхонтоҳур (1 квадрат метр учун 13,3 доллар), Яккасарой (12,2 доллар) ва Яшнобод (10 доллар) туманларида қайд этилди.

Нисбатан арзон ижара нархлари Учтепа (8 доллар), Сергели (7 доллар) ва Бектемир (7 доллар) туманларида қайд этилди.

2022 йил бошидан буён Тошкент шаҳрида ижаранинг ўртача нархи 34,6 фоизга ошди. 

Уй-жой ижараси бўйича йил бошидан буён энг юқори ўсиш Олмазор (57,6 фоиз), Бектемир (50 фоиз) ва Яшнобод (50 фоиз) туманларида қайд этилди.

Прогнозлаштириш ва макроиқтисодий тадқиқотлар институти (PMTI) экспертларига кўра, “Ойбек”, “Тошкент”, “Минор”, “Буюк ипак йўли” метро бекатлари атрофида ва Нукус кўчаси бўйлаб жойлашган, яхши таъмирланган хонадонлар учун 1 000 доллардан юқори ижара нархлари таклиф қилинмоқда.  

Чилонзор ва Юнусобод туманларида ижара нархлари нисбатан пастроқ, аниқроғи таъмирланган хонадонлар учун асосан 400-600 доллар атрофида ижара нархлари таклиф этилмоқда. 

Ўртача таъмирланган хонадонлар таклифи нисбатан камроқ бўлиб, улар асосан Чилонзор ва Юнусобод туманларида, шунингдек, Мирзо Улуғбек шоҳ кўчаси бўйлаб таклиф этилмоқда. Бу ердаги хонадонларнинг ижара нархи асосан 300-800 долларни ташкил этади.

Таъкидланишича, ижарага бериладиган қиммат сегментдаги хонадонлар одатда вақтинчалик ишлаш мақсадида келаётган чет эл фуқароларига таклиф этиляпти ва улар қулай инфратузилмага эга, транспорт қатнови яхши ва озиқ-овқат дўконлари яқин бўлган ҳудудларда жойлашган.

Нисбатан арзон сегментдаги хонадонларнинг кўп эмаслиги ва асосан иккита туманда таклиф этилаётгани ижара бозорини ривожлантириш зарурати борлигини яна бир бор кўрсатади.