IT Park қандай қилиб ҳаваскор дастурчи ўзининг шахсий биржа платформасини яратгани, унинг ишончини суиистеъмол қилган ҳиндистонлик дастурчи, IT соҳасида узоққа бориш учун жамоанинг муҳимлиги ҳақида ҳикоя қилди.
Камрон Зарипов 2003 йил Қорақалпоғистон Республикаси Тўрткўл туманида туғилган. Ҳозирда 20 ёш. У дастлаб 2018 йилда молиявий эркинликка эришиш мақсадида интернет орқали сармоядорга айланиш учун хориж платформалари орқали инвестиция киритган.
Аммо ушбу платформаларнинг ишлаш тизими ва даромад манбаи қаердан келишини тушуниб етгач, дастурчи сифатида иш бошлаган.
Дастурчи бўлиш учун қайси курсларга боргансиз?
Дастурчи бўлиш учун махсус курсларга бормаганман. Асосан видео кўрсатмалар орқали ўрганар эдим. Нима хоҳлаётганингизда қараб YouTube ёки бошқа обунали платформалардан видеоларни кўриб махсус кодларни ёдлашингиз ёки кўчириб олишингиз мумкин.
Шахсий тажрибам давомида маълум давлат ёки хусусий ташкилотларда ишлашни хоҳламаганим учун курсларга бормадим. Аммо буни бошқаларга тавсия бермайман.
Чунки ҳаммада идрок ва ўзлаштириш даражаси ҳар хил. Шундан келиб чиқиб, айтишим мумкинки, IT Park, банклар, дастурий таъминот тизими билан ишловчи хусусий компаниялар ёки ушбу соҳага алоқадор бошқа ташкилотларда ишга жойлашиш учун албатта махсус ўқув курсларига бориш керак.
Бунга сабаб ишга кираётганда сизга масалани ечиш учун видеоларда мавжуд кодлар ёки тайёр алгоритмлардан фойдаланишнинг имкони бўлмайди.
Ҳозиргача ўзим ва халқаро ҳамкорлар иштирок этган ҳамда муваффақиятли якунланган лойиҳалар сони 25 дан ортиқ. Шахсан ўзим муваффақиятли якунлаган лойиҳаларим сони 7 та.
Ҳамкорларнинг асосий қисми Россия, Ҳиндистон, Қозоғистон каби давлатлардан. Барча соҳаларда энг арзон ишчи кучи Ҳиндистонда мавжуд.
Битта лойиҳани тўлиқ ишлаб чиқиш учун шахсан менда 3 кун вақт кетади. Аммо асл ҳақиқат қуйидагича: аксарият дастурчилар deadline’лар айнан тугайдиган кунда ишни якунлаш учун ноутбук олдига ўтиради. Олдинги кунлар эса шунчаки бошланғич алгоритмлар билан банд бўлади.
Даромадлар оқими ва муваффақиятсизлик
IT соҳасида иш олиб бораётганимда даромадларим ўртачадан юқори эди. Маблағларнинг асосий қисми шахсий эҳтиёжларим ва иш қуролларимни янгилашга сарфлаганман.
Дастурчи сирини дастурчи албатта билади. Бу соҳанинг бир қора томони бор. У ҳам бўлса сизга ишонч билдирган ва сиз ишонч билдирган мижозлар ўртасида ёлғон олди-бердининг юз бериш эҳтимоли юқорилигидир.
Тажрибамда бир ҳолатга дуч келганман. Агар бирор чет эллик ҳамкор билан келишувга эришсам хизматни тўлаш учун ўзим ишлаб чиққан платформа орқали ёлғон тўловни амалга оширар эдим. Лойиҳани кўриб чиққандан сўнг, ҳақиқий пулларни ишлаб берувчи ҳисобига ўтказиб берардим.
Маълум вақт келиб фонд бозорида савдо қилиш учун ўзимга жуда керакли бўлган тайёр платформани ҳиндистонлик “дастурчи”дан сотиб олмоқчи бўлдим.
Жуда ҳам шошилганим боис доим бажарадиган ишимни қилмадим ва пулларни унинг ҳисобига ўтказиб юбордим (суммасини очиқлашни хоҳламади). Ҳиндистонлик шахсни бошқа топа олмадим ва катта миқдордаги маблағлар ҳавога учиб кетди.
Аммо шунга қарамасдан яна ишлашда давом этдим ва маблағларимни тенг тақсимлаган ҳолда “Сармоя” дея номланган шахсий токенни ўзим яратган биржа платформасига (zevex.uz) жойлаштириш ишлари билан шуғулландим.
Кейинчалик UZEX Республика Товар-хом ашё биржасидан брокерлик фаолиятини амалга ошириш учун лицензия олишга муваффақ бўлдим.
Ҳозирда биржадан талаб юқори бўлган маҳсулотларни бирламчи қўлларга етказиб бермоқдамиз.
Брокерлик компанияси бўлгани учун даромад солиғи 25 фоизни ташкил этади. Ҳар бир олди-сотдини амалга оширганда тақрибан 50 доллар атрофида комиссия оламиз. Шунинг ҳисобига дастурчиликда оладиган даромадларим миқдори икки баробарга қисқарди.
IT соҳасида жамоавий ишлашнинг аҳамияти
Ҳозирда олиб бораётган фаолиятимни омадсизлик дея баҳоламайман. Аммо IT соҳасида узоққа бориш ва ҳар томонлама ўсиш учун жамоанинг ўрни жуда ҳам муҳим. Чунки йирик лойиҳалар доимо жамоа билан бирга бажарилади. Агар якдил фикрга эга бўлмаганлар йиғилган бўлса жамоа дарз кетиши аниқ.
Бизда ҳам шундай бўлди. Жамоамиз билан бирга ишладик. Аммо бажарган ишларимиз фақатгина мураккаб бўлмаган мобил иловалар ва ўйинлар билан чекланиб қолди.
Биз тарқалиб кетдик. Айримлар давлат идорасига айримлар хусусий компанияларда ишлашни бошлади. Шундай қилиб IT соҳасидаги саргузаштларим вақтинчалик тўхтаб қолди.
Аммо мақсадларим қотиб қолгани йўқ. Яқинда Yandex Games билан шартномага келишиб, кичик ҳажмни ва унча мураккаб бўлмаган ўйинларни сайтга жойлаштириш ниятидамиз.
Изоҳ (0)