Украинага кам миқдорда Ғарб танклари етказиб берилиши низонинг боришини ўзгартирмайди, аммо украиналик ҳарбийларини руҳлантиришда ёрдам беради, деди Украина президенти Владимир Зеленский Германиянинг АRD телеканалига берган интервьюсида.
«Чунки қурол етказиб бераётган Ғарб мамлакатлари бутун дунё биз томонда эканлигини кўрсатмоқда. Менда 10 та танк бор — ҳаммасини олинг. Менда 100 та танк бор — ҳаммаси сизга. Менда битта танк бор — мана, сизга бўлсин, дейишяпти», — дея аниқлик киритди Зеленский.
Украина президенти қайд этишича, Украина қуролли кучлари «минглаб танклари бор» Россия армиясига қарши курашаётган бир пайтда, 10—50 та танк билан муаммони ҳал қилиш имконсиз.
Январь ойида бир қанча Ғарб мамлакатлари Украинага танк етказиб беришни ваъда қилди — Британия ҳукумати ўз ҳудудида ишлаб чиқарилган Challenger 2 эскадронини йўналтиришга ваъда берди, Польша ҳукумати Leopard немис танкларини юбориш ниятини маълум қилди, Берлин бунга рухсат беришини айтиб ўтди.
Шу билан бирга, Германия ҳукумати ўз захираларидаги танкларни АҚШдан олдин етказиб беришдан бош тортиб, буни мамлакатнинг тарихий ўтмиши билан боғламоқда.
The New York Times экспертларга таяниб ёзишича, Германия ҳукумати «тарихда немис қурол-яроғи миллионлаб одамларни ўлдириш учун қўлланилгани» нуқтаи назаридан, қурол етказиб бериш масаласида эҳтиёткорлик қилмоқда.
Изоҳ (0)