2023 йилнинг январида Алексей Навальнийнинг маслакдошлари #FreeНавальний кампанияси бошланганини эълон қилди. Унинг мақсади сиёсатчини озод қилиш учун «бутун дунё бўйлаб саъй-ҳаракатларни» бирлаштиришдан иборат. Россия колониясида сақланаётган сиёсатчи ва бошқа россиялик сиёсий маҳбусларни қўллаб-қувватлаш учун 20 ва 21 январь кунлари турли мамлакатларда митинглар бўлиб ўтди. Намойишчилар Украинадаги урушга ҳам қарши чиқди. Meduza акциялар қандай кечгани ҳақида репортаж тайёрлади.
Москва
Москвадаги Леся Украинка ҳайкали остида Днепрга 14 январь кунги ҳужум қурбонлари хотирасига бағишлаб стихияли тарзда пайдо бўлган ёдгорлик ёнида Катерина Вареник бир кишилик пикет билан чиқди. Полиция уни ҳибсга олгунга қадар, Вареник «Украина бизнинг душманимиз эмас, балки биродаримиз» деган плакат билан турди. «ОВД-Инфо» хабарига кўра, Вареник полиция бўлимига олиб кетилган, у ерда қизга қарши армияни «обрўсизлантириш» ва полицияга бўйсунмаслик моддалари бўйича протоколлар тузилади. У 15 суткагача қамалиши мумкин.
Рига
Ригада Россия элчихонасидан унча узоқ бўлмаган Конгресслар палатаси яқинида россиялик сиёсий маҳбусларни қўллаб-қувватлаш учун ўтказилган акцияда бир неча ўнлаб одамлар йиғилди. TVNET’нинг ёзишича, намойишда «Алексей Навальнийга озодлик», «Иля Яшинга озодлик», «Россияга озодлик» шиорлари янграган. Йиғилганларнинг баъзилари Украинадаги урушга ҳам норозилик билдириб, «Украинадан чиқиб кетинг!», «Урушга йўқ» деб ҳайқирган.
Вильнюс
Россиянинг Вильнюсдаги элчихонаси ёнига 100 дан ортиқ одам тўпланди, деб хабар бермоқда журналист Александр Плюшев. Сота нашрининг ёзишича, митингда «Очиқ Россия» жамоатчилик ташкилотининг собиқ координатори, Россияда «номақбул ташкилот» билан ҳамкорлик қилгани учун уч йиллик шартли қамоқ жазосига ҳукм қилинган Анастасия Шевченко сўзга чиққан.
Таллин
Россиянинг Эстония пойтахти Таллиндаги элчихонаси яқинида ўтказилган митингга 200 га яқин одам тўпланди. Митинг иштирокчилари «Россия озод бўлади!», «Сиёсий маҳбусларга эркинлик!», «Путин Гаагага!», «Путин – биринчи рақамли террорчи» деган шиорларни айтди, деб хабар бермоқда Delfi.
Хелсинки, Иматра ва Тампере
Финляндиянинг камида учта шаҳрида россиялик сиёсий маҳбусларни қўллаб-қувватловчи митинглар ўтказилмоқда. Yle нашрининг хабар беришича, Хелсинкида 50 га яқин одам йиғилган. Одамлар Украина байроғи ва оқ-кўк-оқ рангдаги байроқларни (Россиядаги урушга қарши ҳаракатнинг норасмий рамзи), шунингдек, Иля Яшин, Алексей Навальний ва Беларусдаги норозилик намойишлари етакчиларидан бири Мария Колесникованинг сурати туширилган плакатларни кўтариб олган. Кўпчилик урушга қарши плакатларни ҳам олиб чиққан. Тампере шаҳрида акцияга йигирмага яқин одам келди. Намойишчилар Алексей Навальний, Иля Яшин ва Алексей Гориновнинг нутқларини қайта ўқиди.
Лондон
Стокгольм
Швеция пойтахтида намойишчилар Kulturhuset Stadsteatern театри биноси ёнида тўпланган. Улар ўзлари билан Украина байроқлари ва урушга қарши оқ-кўк байроқларни, шунингдек, Украинанинг вайрон бўлган шаҳарлари номи ва фотосуратлари туширилган плакатларни олиб келган.
Берлин
Берлинда сиёсий маҳбусларни қўллаб-қувватлаш учун 150 га яқин одам йиғилди. Намойишчилар «Навальнийга озодлик!», «Путинга қамоқ!» шиорларини айтган. Deutsche Welle хабар беришича, худди шундай акциялар Гамбург, Геттинген, Дюссельдорф, Франкфурт, Нюрнберг, Мюнхен ва Штутгарт шаҳарларида ҳам бўлиб ўтмоқда.
Мюнхен
Амстердам
Avtozak Live нашри Нидерландия пойтахтида тўпланган одамларнинг аниқ сонини маълум қилмаган, аммо тегишли видеода ўнлаб намойишчиларни кўриш мумкин.
Барселона
Каталония пойтахтида Россия сиёсий маҳбусларини қўллаб-қувватлаш бўйича намойишлар Хитой Янги йилини нишонлаш вақтига тўғри келди.
Тбилиси
Грузия пойтахтидаги митингда россиялик мухолифатчилар, жумладан, «Озод Россия» жамғармаси аъзоси Антон Михалчук ва Навальнийнинг Челябинскдаги штаб-квартираси собиқ координатори Борис Золотаревский сўзга чиқди. Сиёсий маҳбусларни қўллаб-қувватловчи митинг яқинида бошқа намойишчилар ҳам пайдо бўлди – улар россияликларнинг митингига қарши чиқиб, уларни Кремль яқинида йиғилишга чақирди ва 2008 йилда Россия—Грузия можароси пайтида Алексей Навальний Грузия ҳақида ҳурматсизлик билан гапирганини эслатишди.
Ереван
Арманистон пойтахтидаги Россия элчихонаси яқинида ўтказилган акцияда 60 киши иштирок этди. Тахминан бир соат давом этган митинг ҳеч қандай ҳибсга олишларсиз якунланди. Шу билан бирга полиция томошабинларга элчихона биносига яқинлашишга рухсат бермаган.
Лимасол
Акция Кипрнинг Лимасол шаҳрида ҳам бўлиб ўтди. Тадбирда Россия Давлат Думасининг собиқ депутати Дмитрий Гудков «Free political prisoners» плакати билан иштирок этди. Унда Навальний штаб-квартирасининг собиқ раҳбари Сергей Бойко ҳам сўзга чиқди.
София
Белград
Сербия пойтахти Белградда ҳам россиялик сиёсий маҳбусларни қўллаб-қувватлаш митинги бўлиб ўтди.
Гуам ороли
АҚШнинг Тинч океанида жойлашган Гуам оролида россиялик сиёсий маҳбусларни қўллаб-қувватлаш ҳаракати ўтказилди. Бундан ташқари, Американинг кўплаб шаҳарларида, жумладан Нью-Йорк, Сиэтл, Хьюстон, Бостон, Филаделфия, Майами, Лос-Анжелес ва Орландо шаҳарларида митинглар бўлиб ўтди.
Барнаул
Россия таркибидаги Олтой ўлкасининг маъмурий маркази Барнаулда ҳам бир кишилик пикет ўтказилди. «ОВД-Инфо» хабарига кўра, эркак қўлга олинган ва унга нисбатан Россия армиясини «обрўсизлантириш» бўйича протокол тузилган.
Бишкек
Қирғизистон пойтахти Бишкекда Россиядаги сиёсий маҳбусларни қўллаб-қувватлаш акцияси маҳаллий полиция томонидан тарқатилди. Сота хабарига кўра, дастлаб полиция акцияни бошқа жойда ўтказишни сўраган, сўнг Бишкекда хорижликларнинг оммавий тадбирлар ўтказиши тақиқланганини айтиб, йиғилганлардан (30 киши) тарқалишни талаб қилган.
Вена
Австрия пойтахтида сиёсий маҳбусларни қўллаб-қувватлаш митинги чоғида фаоллар 30 метрлик баннерни ёйиб чиқди. Унда «Озодликнинг қўл-оёғини михлаб ташлашингиз мумкин, лекин инсон руҳи кишан билмайди!» деб ёзилган. Бу ёзув 1976 йилнинг август ойида Санкт-Петербургдаги Петропавловский қалъаси деворига рассомлар Юлий Рибаков ва Олег Волков томонидан ёзиб кетилганди. СССРдаги сиёсий акциялардан бири бўлган ушбу ҳаракат учун улар мос равишда олти ва етти йиллик колонияга ҳукм қилинган. Ушбу жиноят ишини тергов қилишда ўша пайтда 23 ёш бўлган КГБ лейтенанти — Владимир Путин ҳам иштирок этган.
Изоҳ (0)