Канада ҳукумати туб аҳоли вакиллари билан ўтмишда уларга нисбатан таҳқирлашлар ва маданий ҳуқуқларнинг чекланиши туфайли товон пули ҳақида келишиб олди. Бу ҳақда Канада ҳукумати сайтида хабар берилди.
Канада мамлакатнинг туб аҳолисига улар қачонлардир хўрлангани, маданият ва тилга оид ҳуқуқлари чеклангани учун товон пули сифатида 2,8 миллиард Канада доллари (тахминан 2,1 миллиард АҚШ доллари) тўлашга рози бўлди.
Канада ҳукуматига нисбатан даъво 2012 йилда туб жамоатчиликларнинг 325 нафар вакиллари томонидан гуруҳ бўлиб судга киритилган эди. Улар XIX асрдан ХХ аср охиригача бўлган даврда ўз тили ва маданиятига нисбатан геноцид учун товон пули талаб қилди. Томонлар эришган келишув энди мамлакат Федерал суди томонидан маъқулланиши керак.
Маблағ махсус жамғармага ўтказиб берилиши, уни туб аҳоли ўз ихтиёрига кўра ишлатиши мумкин бўлиши кўзда тутилмоқда.
«Канадага ўз тарихини тан олиш учун, ўзи амалга оширган геноцидни эътироф этиш учун ва мактаб-интернатлар томонидан халқларимизга етказилган коллектив зарарни тан олиш учун жуда кўп вақт керак бўлди», — дея қарорни изоҳлади даъвогарлардан бири, туб халқлар вакили Гарри Фешук.
Канадада туб аҳолининг фарзандлари учун интернат мактаблари 19-асрнинг ўрталаридан 20-асрнинг охирларига қадар мавжуд бўлган. Бундай мактабларда 150 мингдан ортиқ бола ўқитилган, улар оилаларидан олиб қўйилиб, мажбурий ассимиляция қилинган. Мактаб-интернат тарбияланувчилари зўравонликларга дучор бўлган, яхши овқатланиш ва даволанишдан маҳрум қилинган.
2021 йил май ойида Британиянинг Колумбия провинциясидаги собиқ мактаб-интернати ҳудудида 200 дан ортиқ боланинг қолдиқлари бўлган йирик қабр топилганди. Канада бош вазири Жастин Трюдо оммавий қабрни «Канада тарихидаги қоронғу ва шармандали бобнинг оғриқли нишонаси» деб атади.
2021 йил июнида Канаданинг Саскачеван провинцияси туб аҳолиси жамоатчилиги вакиллари Канада туб халқларининг болалари учун мўлжалланган собиқ мактаб-интернат ҳудудида 751 та номаълум қабр топилгани ҳақида хабар берди. Мактаб-интернат 1899—1997 йилларда фаолият олиб борган. Унинг ҳудудида қабристон бор ва ундан номсиз қабрлар топилган. Георадар ёрдамида топилган ушбу қабрларда кимлар дафн этилгани ҳали номаълум.
Изоҳ (0)