Россия Эстония билан дипломатик алоқалари даражасини пасайтириб, дипломатик вакиллар мақомини вақтинчалик ваколатли шахсларга ўзгартирди. Бу ҳақда Россия Ташқи ишлар вазирлиги хабар берди.
Эстония элчиси 7 февралга қадар Москвани тарк этиши керак бўлади.
Россия ТИВ ўз қарорини яқинда Таллиндаги Россия элчихонаси ходимларининг қисқартирилишига жавоб деб атади.
Шунингдек, ТИВ хабарида айтилишича, Эстония сўнгги йилларда Россия билан муносабатларни «қасддан бузмоқда».
«Оммавий русофобия, бизнинг мамлакатимизга нисбатан душманлик туйғусининг сингдирилиши Таллин томонидан давлат сиёсати даражасигача олиб чиқилди», — дейилади муассаса хабарида.
Эстония 11 январь куни Таллиндаги Россия элчихонаси ходимларини икки марта қисқартиришни талаб қилди. Болтиқ мамлакати ҳукумати буни мамлакатлар дипломатик миссияларида «паритетга ёки лавозимлар сонида тенгликка эришиш» зарурияти билан изоҳлади.
Россия Украинага бостириб кирганидан кейин Эстония бир неча марта россиялик дипломатларни мамлакатдан чиқариб юборди. Шунингдек, Эстония ҳукумати ташаббуси билан Россиянинг Тарту ва Нарвадаги дипломатик миссиялари ёпилди.
Аввалроқ Эстония Европа Иттифоқи мамлакатларидан биринчи бўлиб Россия активларини Киевга ўтказишга тайёрланаётгани хабар берилган эди. Эстония мамлакатда музлатилган Россия активларини Украинага ўтказиш имконини берувчи қонунчилик базасини 2023 йилнинг январь ойи охиригача яратишни режалаштирмоқда.
Эслатиб ўтамиз, ўтган йил октябрида Эстония парламенти Россияни терроризмга ҳомийлик қилувчи давлат деб эълон қилган эди.
Изоҳ (0)