Банк омонатлари нафақат пулни тежаш, балки жамғармаларни кўпайтиришнинг ҳам ишончли усулидир. Марказий банкнинг FinLit лойиҳаси бундай омонатларни қандай танлаш бўйича маълумот берди.
Дейлик, сиз банкка маълум миқдордаги пулни топширасиз, банк эса сизга маблағлар сақланган муддати учун фоизлар тўлайди. Бошқача айтганда, сиз пул ишлаб топасиз ва ишлаб топилган пуллар сиз учун ишлашни бошлайди.
Бугунги кунда банкка бориб (офлайн тарзда) омонат ҳисобварағини очиш мумкин ёки банк картаси ва банк иловаси ёрдамида (онлайн тарзда) банкка омонат қўйиш имконияти ҳам бор.
Онлайн омонатларнинг фоизлари ҳам оддий омонатлар фоизлари каби ҳисобланади ҳамда пул банк картасига ёки мобил иловадаги электрон ҳамёнга ўтказилади. Фоизларни ҳисоб-китоб қилиш учун Депозит калкуляторидан фойдаланиш лозим.
Онлайн ёки офлайн режимда очилган ҳар қандай омонат фуқароларнинг банклардаги омонатларини кафолатлаш фонди томонидан омонатнинг валютаси ва миқдоридан қатъи назар, тўлиқ қайтарилиши кафолатланади.
Бугунги кунда банклар омонатлар юзасидан мижозларга ранг-баранг таклифларни тақдим этмоқда. Таклифларни ўрганиш ва омонатларни танлаш жараёнида дастлаб қуйидаги уч жиҳатга эътибор қаратиш лозим:
Фоизлар чегараси
Банкларда 14 фоиздан 24 фоизгача бўлган омонат турлари мавжуд. Табиийки, хизмат юзасидан белгиланган шартлар маълум тафовутларни юзага келтирган.
Бир банкдаги омонатлар турига қараб ҳар хил фоизда бўлиши мумкин. Мижозларга бевосита омонат шартномалари билан тўлиқ танишиб чиқиш тавсия этилади.
Миқдор чегараси
Банклар омонат очишдаги энг кам пул миқдорини белгилашда мустақилдир. Масалан, «Алоқабанк»да 0 сўм, минг сўм, 50 минг сўм, «Анор банк» ва «Микрокредитбанк»да 100 минг сўм минимал суммадаги омонат турлари мавжуд бўлса, Asia alliance bank’да минимал суммаси 5 млн сўм бўлган омонат турига ҳам дуч келиш мумкин.
Аксарият банклар бошланғич суммаси 500 минг сўм ва 1 млн сўм бўлган омонат турларини таклиф этади.
Муддат чегараси
Банкларда фоизлар ва миқдор сингари омонат муддатлари ҳам бир-биридан фарқланиши мумкин. Масалан, «Асакабанк», «Ипак йўли банк»да 3 ойлик муддатдаги омонатлар мавжуд. Аксарият банклардаги омонат турлари 6—12 ойдаги муддат учун мўлжалланган.
Омонат бўйича тўлиқ маълумотларни тижорат банкларининг веб-саҳифасидан ёки мобил иловасидан олиш мумкин.
Изоҳ (0)