Халқ депутатлари Тошкент шаҳар кенгаши собиқ ҳоким Жаҳонгир Ортиқхўжаевга миннатдорлик билдиргани ҳақида хабарлар тарқалди. Кейинчалик кенгаш котибияти бу хабарни рад этди.
Кенгаш раҳбари ўринбосари Тошпўлат Матибоев ўз баёнотида депутатлар номидан собиқ ҳокимга мурожаатнома эълон қилинмаганини билдирди. «Биз бу мурожаатни қўллаб-қувватламаймиз», дейилади баёнотда. Хабарнинг бу қисми кейинчалик олиб ташланди.
«Ҳурматли Тошкент шаҳри фуқаролари. Ижтимоий тармоқларда тарқалган халқ депутатлари Тошкент шаҳар кенгашининг мурожаатномаси бўйича шуни маълум қиламизки, 16—17 январь кунлари халқ депутатлари кенгашининг ҳеч қандай йиғилиши бўлиб ўтмади ва кенгаш депутатлари номидан Тошкент шаҳар собиқ ҳокими Жаҳонгир Ортиқхўжаев тўғрисида баёнот берилмади», — дейди Тошпўлат Матибоев.
Ижтимоий тармоқларда тарқалган постга Тошкент ҳокимлиги матбуот хизмати томонидан Жаҳонгир Ортиқхўжаевнинг кўп соатлик фуқаролар қабулидан лавҳалар акс эттирилган видеоролик илова қилинганди. Ҳокимлик мазкур қабуллар кечгача давом этгани, аҳолининг аксарият муаммолари ҳал этилгани ҳақида хабар берган. Кадрларда одамларнинг кўз ёшлари билан ҳокимга миннатдорлик билдиришларини кўриш мумкин.
Изоҳ (0)