Ўзбекистон халқ артисти, цирк устаси Ҳаким Зарипов 18 январь куни 99 ёшида вафот этди. Бу ҳақда Маданият вазирлиги хабар қилди.
Қайд этилишича, марҳум 1924 йилнинг 17 сентябрида Тошкент шаҳрида таваллуд топган, 1947 йилда Ўзбекистон давлат консерваториясини тамомлаган.
Ҳаким Зарипов ўз меҳнат фаолиятини 1942 йилда «Ўзбек давлат цирки» республика бирлашмасида чавандоз сифатида бошлаган. У 1946–1997 йиллар давомида цирк санъатининг устаси, иқтидорли чавандоз, ҳайвон ўргатувчиси, масхарабоз, кино актёри, каскадёр сифатида фаолият юритган.
«Ҳаким Зарипов ўзбек цирки санъатини ривожлантиришга катта ҳисса қўшиб келаётган уста, бадиий ва ижодий гуруҳ раҳбари, отасининг ишини муносиб давом эттирган, республика ва жаҳон миқёсида ўтказилган томошаларда қатнашиб, Ўзбекистон байроғини юқорига кўтарган, бутун дунёга ўзбек циркини таништирган артист сифатида эл-юрт ҳурматига сазовор бўлган меҳнат фахрийси эди.
Маданият ва туризм вазирлиги жамоаси марҳумнинг вафоти муносабати билан унинг оила аъзолари ва яқинларига ҳамдардлик билдиради», — дейилади хабарда.
Изоҳ (0)