«Одил судловга эришиш имкониятларини янада кенгайтириш ва судлар фаолияти самарадорлигини оширишга доир қўшимча чора-тадбирлар тўғрисида»ги президент фармони қабул қилинди.
Ҳужжат билан суднинг мустақиллиги ва судьялар дахлсизлигини таъминлашни кучайтириш бўйича чоралар белгиланмоқда.
Хусусан, судга ҳурматсизлик қилиш ҳолатларининг олдини олишнинг самарали механизмлари ишлаб чиқилиб, бунинг учун маъмурий жавобгарлик чораларини кучайтириш ва жиноий жавобгарлик белгиланиши кўзда тутилмоқда.
Суд ишларини ҳал этишга аралашганлик ва суд ҳужжатини ижро этмаганлик учун жавобгарлик чоралари кучайтирилади. Шунингдек, суд ҳужжатларининг ижро этилишини таъминлашга қаратилган таъсирчан механизмлар жорий этилади.
Одил судловни амалга ошириш фаолиятига аралашганликка оид ҳар бир жиноят иши якуни бўйича жамоатчиликни оммавий ахборот воситалари орқали мажбурий равишда хабардор қилиш тартиби жорий этилади.
Судьяга нисбатан турар жой дахлсизлигига, ёзишмалар, телефон орқали сўзлашувлар ва бошқа сўзлашувлар, алоқа тармоқлари орқали узатиладиган почта, курьерлик жўнатмалари ва телеграф хабарларининг сир сақланишига бўлган ҳуқуқларни чекловчи, шунингдек, абонентлар ёки абонент қурилмалари ўртасидаги боғланишлар тўғрисидаги ахборотни олишдан иборат тезкор-қидирув тадбирларининг ўтказилишига фақат бош прокурорнинг санкцияси асосида йўл қўйилиши белгиланади.
Мавзуга доир: Ўзбекистонда айрим суд ишларини юритиш маъмурий органларга ўтказилади
Изоҳ (0)