Бугун, 17 ноябрь куни бўлиб ўтаётган Олий Мажлис Қонунчилик палатаси йиғилишида «Молиявий истеъмол кредити бериш тизими такомиллаштирилиши муносабати билан ‘Истеъмол кредити тўғрисида’ги қонуннинг 15-моддасига ўзгартиш киритиш ҳақида»ги қонун лойиҳаси иккинчи ўқишда кўриб чиқилди. Бу ҳақда палата матбуот хизмати хабар берди.
Маълум қилинишича, қонун лойиҳаси билан хусусий тадбиркорликни янада ривожлантириш, фуқароларга қўшимча қулайликлар яратиш мақсадида истеъмол кредитидан фойдаланиш механизми кенгайтирилмоқда. Ҳужжат асосида Ўзбекистонда ишлаб чиқарилмаган товарлар (хизматлар) учун ҳам истеъмол кредити ажратишга рухсат бериляпти.
Мажлисда кейинги пайтларда истеъмол кредитлари учун талаб ортиб бораётгани, аммо амалдаги қонунда Ўзбекистонда ишлаб чиқарилмайдиган товарлар (хизматлар)га истеъмол кредити бериш чеклангани такидланган. Бу эса аҳолининг ўз ҳисобидан кредит эвазига харид қиладиган маҳсулотини танлаш имкониятини камайтириши билан бирга, истеъмолчилар ҳуқуқ ва манфаатлари бузилишига олиб келган.
Хабарга кўра, қонун лойиҳасида «Истеъмол кредити тўғрисида»ги қонунга жисмоний ва юридик шахслар томонидан сотиладиган товарлар (хизматлар) ҳамда Ўзбекистондан ташқарида ишлаб чиқарилган товарлар (хизматлар) учун молиявий истеъмол кредитлари бериш имкониятини назарда тутувчи ўзгартишлар киритилмоқда.
Қонун лойиҳаси депутатлар томонидан қабул қилинган.
Изоҳ (0)